Nai balebale dina ni nona a mai lia tamata na gone turaga o Jisu Karisito

Edai eda na marautaka na nona a mai sucu ena vale ni manumanu na noda gone turaga o Jisu Karisito, na luve ni Kalou.

E rogo levu kina na sucu oqo ena vuravura taucoko baleta na nona a mai caramaka ka vakaraitaka vei keda na gaunisala meda muria meda rawa nida lai bula vata kei koya kei na tamada vakalomalagi ni oti na bula oqo.

E yacova sara na nona a lai vako mate ena kauvelatai. A solia na nona bula me bokoci kina na noda i valavala ca na tamata kece.

E dolava na ka tuba me rawa nida veivutunitaka na noda i valavala ca. Ni sa da savasava ena qai rawa nida curu kina Matanitu vakalomalagi ka tawamudu.

E sega ni dua na ka dukadukali e rawa ni bula e kea.

Kea a sega ni a mai mate ena vukuda o Jisu kea a sega nida raica vakabibi, marautaka ka vakananuma kina na nona sucu.

Na nona sucu e vaka ga na sucu ni dua tale na gone.

E udolu vakaudolu na gone era sucu ena vuravura oqo ena veisiga.

E dua tani kina na sucu oqo baleta ni sema vata kei na siga ni mate eda dau vakananuma ena vula ko Epereli ena vei yabaki,

Oqo na vuna levu eda vakananuma kina na rua na siga oqo.

E dai, nai ka 25 ni Tiseba ena vei yabaki, eda dau vakananuma kina na nona sucu.

Eda kila ni a talai koya mai na tamada vakalomalagi me mai sucu vakatamata, me vakavulici keda meda talai rawarawa kina nai vunau ni Kalou ka cakava na lomana.

I VALAVALA CA

E na nona veiqaravi e yaco sara me vakarararawataki, kasiviti, beitaki vakailasu ka vako mate ena kauvelatai.

E vosota kece o Jisu na mosi levu oqo kei na nona mate vakaloloma ka vosoti ira na nona meca kei ira era beitaki koya, vakararawataki koya, vakoti koya me yacova sara na nona mate.

Ea cola kece o koya na noda i valavala ca. E na nona masu vua na tamada vakalomalagi e Kecesimani eda vulica kina na bibi ni colacola.

E dua na mala ni nona vosa a vakaraitaka nisa tarabi na i colacola ia me yaco ga na lomana na tamada vakalomalagi.

E vakaraitaka eke ni tamata tiko vakataki keda ga.

Ia, sa solia na nona bula vua na tamada vakalomalagi.

Sa kila tiko a koya nina lakova na veivakararawataki ni bera ni lai mate. Na bibi ni nona i colacola e basika na dra e na tikina ni yagona taucoko.

Ena gauna qai biuti Kecesimani mai kina sa vakarau tu vakayago kei na vakayalo me vosota na veivakararawataki levu e caka vei koya.

Na nona sucu, mate ena kauvelatai na kena lutua levu taudua na nona a tucake tale mai na mate - nai sevu ni tucake tale.

Na tamata kece wili kina o ira era a mate ni se bera na nona a tucake tale o Jisu era na tucake tale.

Oqo e dua nai solisoli levu ka dolava na katuba me rawa nida cakacakataki keda ka veivutunitaka na noda i valavala ca. Dua na siga eda na duri e mata ni Kalou ka vakatarogi ena noda i valavala e na vuravura oqo.

Na macala ni vei tarogi oqo ena digitaki kina e vei na vanua eda na bula tawamudu kina.

Eda wilika e nai Vola Tabu “ni sa levu na tikina ena vale nei Tamaqu. Kena i balebale ni levu tu nai vakatagedege ena Matanitu vakalomalagi.

E vei eda na lai tiko kina sa vakatau saraga vei keda yadudua. Sega ni rawa ni da na beitaka tale e dua.

Sa mai vakaraitaka o Jisu na gaunisala meda muria. Sa sega tale nai ulubale.

RAI LESU

E na Siga ni Sucu e dai e dodonu meda tu vakadua ka rai lesu. Na cava e rawa se dodonu meu cakava meu vakamuria kina na nona i vakavuvuli o Jisu.

Ke dua nai tovo iko vakayacora tiko e sega ni sala vata kei na nona i vakavuvuli sa dodonu mo biuta laivi.

Mo wilika na I Vola Tabu, vakarogoca na vunau mai vei ira nai lumuti ni Kalou, lolo ka masumasu tiko me vakaukauwataki iko na Yalo Tabu ni Kalou mo veivutuni ka veisau.

Na sucu nei Jisu ei vakatakarakara talega ni vakasama vaka Sucu Vou.

O Jisu a mai veisautaka ka vakavoiya e levu nai vakarau ni noda bula ena 30 vakacaca na yabaki e bula voli kina ena dela ni vuravura oqo ena vanua ko Palesitine.

Ea vakabulai ira na tauvi mate kei ira sa mate.

E kauta mai na veisaututaki, vei lomani kei na vei vosoti, veivukei ka vakabibi vei ira era vakaloloma. Oqo nai balebale dina ni Siga ni Sucu.

Sa nuitaki ni da vakayacora vaka kina. Sa nona masu kei na vakanuinui vinaka na Siga Rarama me nomuni na kalougata ni Siga ni Sucu kei na tawase ni yabaki vou.