TUKUTUKU RARABA Kidavaki nai Talatala Qase vou e Sawaieke
Era sa kidavaka vakavanua ka vakalotu talega e Sawaieike, Gau na iTalatala Qase o Ilaisa Tulele. Ko na italatala Tulele ea italatala tu mai na tikina o Vanuaso, Gau ka wili kina na tabacakacaka o Vanuaso, Lekanai, Nacavanadi, Malawai kei Lamiti.
E vakaraitaka mai e dua na ivavakoso mai Sawaieke o Ratu Tomasi Tokalauvere ni ra a veikau yani vakavanua mai Vanuaso e nai ka 23 ni Tiseba.
Na veikidavi vakalotu vei Talatala Tulele e tukuna o Ratu Tokalauvere ni a vakayacori ena lotu ni siganisucu enai ka 25 ni Tiseba.
Sa Tawana tiko o Talatala Tulele na itikotiko ni lotu e Sawaieke ka yacana tiko o Saioni. Ko Talatala Tulele, e tukuna o Ratu Tokaluvere e sega ni vulagi e Sawaieke ni koya e dua na nodra vasu levu .
Na tinana e gole mai vei iratou na turaga na Takalai Gau.
Ena nona sa na mai veiqaravi tiko e Sawaieke ena wili talega kina na iwasewase o Gau, Nairai, Batiki, Bulu Methodist Training Centre kei na Gau High School.
Ko Talatala Tulele e sosomitaki Sevanaia Volaunisiga e dua vei ira na italatala ni lotu Wesele e sega ni via cula.
Sa biuti Sawaieke mai na italatala ko
Volaunisiga e nai ka 13 ni Tiseba ni oti na nodra vakatakakanataki koya na lewe ni wasewase. E tukuna o Ratu Tokaluvere ni na lewe ni vale talega nei Talatala Volaunisiga e qasenivui ia sa vakacegui mai na Tabacakacaka ni Vuli ni bese talega na cula.
Era a veivuke na ivavakoso mai Sawaieke ena nona vakavodoki mai ko Talatala Volaunisiga vata kei na nona iyaya taucoko.
Ko ira e Sawaieke era a loloma ilavo talega vei Talatala Volaunisiga.
Eratou a cakava talega e dua na kakana kei vakatawa Ratu Jone Qioniveiwasaliwa ka sa mai vakacegui talega ni sega talega ni cula.
O Ratu Qioniveiwasaliwa e ai vakatawa tu mai na koro ko Nawaikama. >MAIKA BOLATIKI