Tadola na Makete ni Yaqona e Koro
Ni sa tadola na iyalayala kei Viti, sa tadola talega na makete ni yaqona ena tikina o Cawa mai Koro, Lomaiviti.
Na mata ni tikina o Cawa kina Bose ni Yasana o Lomaiviti o Josese Masinawa, e tukuna ni sa tolu na makete eratou sa via volia na yaqona e Cawa.
Ko iratou na kabani na Taki Mai e tukuna o Masinawa ni ratou laki vakalili yaqona drokadroka walega.
Ia, na kabani na Lami Kava e volia ruarua na yaqona drokadroka kei koya e mamaca.
E sa vakasalataki ira na dau tei yaqona o Masinawa mera taura vakamalua ka digitaka vinaka na nodra makete.
Sa toso tale tikoga e dua na veitalanoa kei na dua na dau ni bisinisi mai Mereke, ka via mai dua na nona iqaqi ni yaqona e Cawa.
Na turaga ni Mereke oqo e tukuna o Masinawa ni na gole mai ki Viti ni sa tadola na veitosoyaki.
Sa kerea tiko e dua na tiki ni qele e Tavua me mai dabe kina na nona iqaqi.
Ena vula ga o Noveba eratou lewe lima na dau tei yaqona e ratou volitaki yaqona kina Taki Mai ka ratou rawata kina e $19,000.
E ratou vakayagataka na nodratou ilavo ena kena voli na iyaya ni nodratou vale.
E dua na ituvatuva ni tei yaqona me yabaki tolu sa tiko ka gadrevi kina mera tea e 1,000 na vuni yaqona kei na 1,000 na dalo na dauteitei ena tikina o Cawa.
“Au sa qai sikova walega na nodra iteitei ena vula sa oti kara rawata kece na takete kara samaka vinaka tu na nodra iteitei,” e tukuna o Masinawa.
E dua ka sa qai biu vuli ga, esa vakasobura yani ena macawa sa oti nai yaya ni nona vale mai na ilavo ni nona yaqona.
Sa vakasalataki ira na dau tei yaqona e Cawa o Masinawa mera yalomatuataka na nodra yaqona ka mera kakua ni cavuta dole mera waraka ni sa yabaki tolu se sivia.
Era sa kerei mera kakua ni cavuta vakaveitalia na nodra yaqona ena gauna ni marau eda lako curuma tiko oqo.
Na tikina ko Cawa e tiko kina e ono na koro – Nabasovi, Vatulele, Nabuna, Tavua, Navaga kei Kade.
ENA QAI TOMANI TALE YANI ENA MACAWA KA TU MAI