Ena Rawata Rawa o Na Ka Levu na 5000 na Saini?
Ena yabaki sa oti a sasagataka tiko na turaga Na Ka Levu o Ratu Tevita Makutu me vakadeitaki na soqosoqo vakapolitiki ka nanumi tiko me yacana na ‘One Movement’.
Esa yabaki vou mai qo, ka levu sara na vakatataro e gole tiko mai vei ira na lewenivanua ka vakabibi na kawa iTaukei se na vanua cava esa yaco tiko kina me vaka ni sa roro voleka tiko mai na gauna ni veidigidigi.
Na ‘One Movement’ qo e nanumi tiko me na liutaka na iliuliu ni SODELPA o Viliame Gavoka.
O Gavoka esa vakadeitaka oti ni na dei tiko ga ena SODELPA, me vaka ni sa koto kina na nodra vakanuinui na lewenivanua ena kena rawati na qaqa ena veidigidigi levu ena yabaki oqo.
Ea veitaratara tiko na Siga Rarama kivei Ratu Tevita ena vula o Okosita ni yabaki sa oti, e tukuna me soli tale vua e rua na macawa me na qai vakamacalataka mai kina na veika esa lalawataki tiko.
Ia, ena macawa oqo e tukuna mai me soli tale vua me yacova na ika tinikavitu ni siga ni vula oqo.
Kevaka e nanuma tiko o Ratu Tevita me vakaduria na isoqosoqo oqo me baleta na kawa iTaukei ka me sosomitaka na SODELPA, au vakabauta ni na vakalusi gauna walega vua kei ira na nona ilala.
Na vuna oqo, baleta e sa levu na isoqosoqo vakapolitiki era sa cici rawa tiko ena gauna oqo ka ra veiliutaki tiko kina na iTaukei. Qo e wili kina na :
■FijiFirst - Voreqe Bainimarama;
■SODELPA- Viliame Gavoka;
■The People’s Alliance - Sitiveni Rabuka;
■Natio■a● Federation Party- Peresitedi- Pio Tikoduadua;
■U■ity Fiji- Savenaca Narube
■HOPE - Tupou Draunidalo
O ira na kawa iTaukei era na digia ga e dua vei ira na soqosoqo oqo.
NA TARO E TIKO OQO:
■E sa rawata rawa na 5000 na saini ka vinakati tiko me rawa ni duri rawa kina na ‘One Movement’?
■Na cava ese vakatatao tiko?
■Na cava e sega ni via vosa tiko mai kina vei ira na dau ni volaitukutuku?
E tiko na veika e lavaka mai na valevolavola levu ni veidigidigi (Election Office) ena dodonu mena vakayacora o Ratu Tevita me rawa kina ni vakadeitaki na isoqosoqo vakatutu oqo na ‘One Movement’.
Ia, kevaka e sega ni na yacova na veika e gadrevi, au vakabauta ni sa dodonu ga vua me tomani Gavoka ena SODELPA, me vaka e rau sa veitalanoa oti kina.
YASANA O BA
Era sa vakadeitaka mai eso na Momo ni vanua ni yasana o Ba ni sa lai caka yaqona kivei ira na matanivanua nei Ratu Tevita, ena yabaki sa oti.
Na yaqona oqo era kaya ni vakaraitaki tiko vei ira me baleta na gagadre e tiko, ka kerei tale tiko ga kina na nodra veitokoni kina soqosoqo vakatututaki tiko qo. Ciqomi talega nai tukutuku ni ra lai yaco sara kina vanua o Ra.
Tukuna na Tui Nalawa - Ratu Epeli Niudamu, ni dola tu na nona vanua vei ira na soqosoqo vakapolitiki era via gole yani me ra lai vunau. Tomana ka kaya ni digidigi yadudua e tiko saraga vei ira na lewenivanua se ocei mera na digitaka.
Na Momo na Tui Ba- Ratu Filimoni Nale, e dau vakabibitaka tiko vei ira na lewenivanua mera tokona na FijiFirst. Na vuna e kaya kina oqo baleta ni sa vakadinadinataka na veivuke levu e cakava tiko na Matanitu kivei ira na lewenivanua.
ENA QAI TOMANI TALE YANI ENA MACAWA KA TU MAI