Na Cava na Vuna e dau Sega ni Vakaitavi tiko kina na Tui Sabeto ena Vanua, Lotu kei na Matanitu?
E levu sara era vakatataro tiko se na cava na vuna e dau sega ni vakaitavitaki koya tiko kina na Momo Levu na Tui Sabeto - Ratu Tevita Mataitoga, ena Vanua, Lotu kei na Matanitu.
Esa qai vakadeitaka mai na radini vanua o Sabeto- Merewarita Meli, ni Tui Sabeto e turaga mamadua, ka dau sega ni vinakata me dau laurai ena matana levu se ena veisoqo lelevu.
Ia, nai tukutuku e ciqomi rawa ni dau levu sara na veisoqo bibi e vakayacori ena vanua ni yasana o Ba e dau sega ni laurai kina.
Oqo e sai ka 14 ni yabaki ni nona tutu vaka Tui Sabeto o Ratu Tevita.
E levu era taroga tiko na cava e duidui kina na okoya mai vei ira tale na vo turaga ena vei yasana?
Oqo e sega ni vakaraitaka vinaka me bulataka e dua e ilutaka tiko na vanua. Era na raica tiko o ira na nona tamata na veika e vakayacora tiko.
Kevaka e da kaya nida turaga, io me da turaga ni tamata ka dau ni veiqaravi.
E tolu na yavu levu e da vakarurugi kina na tamata tabusakayani, oqo na Lotu,Vanua kei na Matanitu.
O ira madaga na noda turaga ena veiyasana ena noda vanua, e dau rawarawa na veitalanoa ka veiwasei kei ira ena ulutaga cava ga. Oqo era wili tiko kina e levu sara na Momo ni Vanua o Ba.
Ena Bose ni Momo ni Yasana o Ba ka a vakayacori mai Lautoka ena i ka 3 ni siga ni vula Tiseba, 2021, a sega ni tiko kina na Tui Sabeto.
Tukutuku talega e ciqomi rawa ni dau sega ni tiko ena Bose ni Yasana o Ba ka dau vakayacori ena veiyabaki.
Ea sega talega ni laurai ena soqo ni vakasuka qele vua na Momo Levu na Tui Nawaka o Ratu
Asaeli Driu Naevo ena siga Vukelulu sa oti.
Na veika oqo, e sa lai yaco sara vei ira na dau ni volaitukutuku, ena nodra sasaga mera veitalanoa kei na Tui Sabeto, qai dau sega ni vakatarai mai.
RADINI VANUA SABETO
Esa qai vakadeitaka mai na radini vanua o Sabeto- Merewarita Meli, ni Tui Sabeto e turaga mamadua, ka dau sega ni vinakata me dau laurai ena matana levu se ena veisoqo lelevu.
“Ena dau lai tiko ga ena Bose Ni Yasana o Ba kei na Bose Ni Momo, kevaka e vakau mai vua e dua na ivola,” tukuna na radini na vanua.
Tomana na radini vanua, ni nona bula na Tui Sabeto e bula tuga vakavanua.