Liuliu Ni Matanitu E sa Tiki ni Noda Bula Meda Dau Loloma, Dau Veiciqomi, Meda Nuitaka na Veika Vinaka ka Buluta na Ca
Keitou na tomana tiko na nodra vukei o ira na vakaleqai ena noda vanua, me kua ni dua me vakuwai ena veivuke. Meda vakayagataka na gauna qo me yaga kina noda veivuvale, ena noda itikotiko, ena lomanikoro ena noda veiwaseitaka na loloma, dina ga ni levu na
Ni sa bula vinaka na turagabale, na maramabale, ni bula vinaka tale ga na turaga, marama, cauravou, goneyalewa, kei kemuni na luveda, oni dau taleitaka na vaka-rorogo ena noda gauna vaka-macawa.
Ni bula vinaka tale ga na iLiuliu ni noda Lotu e Viti kei Rotuma. Au sa vaka-vinavinaka-taka vakalevu na itavi bibi oni qarava tiko ena cabori ni noda vanua vua na noda Kalou.
Esa itakele levu ni noda sasabai na noda masulaka tiko na noda vanua. Me bula o Viti, me toso tiko ga i liu.
Au nuitaka ni vakaibalebale vei keda na Siganisucu ni Turaga eda sa mai vakanadakua.
Ena duidui beka na iwalewale ni noda marautaka na siga e vakananumi kina na nona mai lia-tamata na Karisito, ia e umani keda vata na ibalebale levu ni noda marautaka na nona mai sucu - o Imanueli, sa tiko vata kei keda na Kalou.
Eda vakanuinui vua baleta ni sega vakadua ni yawaki keda.
Ena kena dewa vakayauyau na COVID-19 ena noda vanua, eda a sega ni vakadeitaka na noda na marautaka na Siganisucu.
Eso e nanuma talega ni na veivaleqai sara vakalevu ke dewa mai Viti na mataqali manumanu vou ni COVID-19 na Omicron baleta ni totolo sara na kena dewa.
Au gadreva meu vakadeitaki kemuni na lewenivanua, nida na walia na dredre cava ga eda na sotava.
E vu ni noda qaqa na noda duavata meda walia na bolebole kece e sotavi.
Na kena ivakaraitaki oya ni sa dua na iwase levu ni lewenivanua eda sa cula vakarua.
Au gadreva meu vakavinavinakataki kemuni tale.
E sega ni dredre na walia na leqa; ia au dau vakavinavinakataka na igu oni solia me tosoi kina e liu na noda vanua.
Na igu qori e dau vukea vakalevu na sasaga ni matanitu.
O Viti na noda vanua domoni – e totoka na iwalewale ni kena liutaki ka dei vinaka tu na lawa.
YAVU NI VAKAVULEWA
E vica beka vei keda eda rawa ni cavuqaqataka se sa bau rogoca na ikau ni Yavunivakavulewa? E vaqo;
O KEIMAMI NA
LEWENIVANUA E VITI,
■ROKOVA na itaukei ni vanua se kawa itaukei, na nodra taukena na kedra qele, na nodra itovo, ivakarau kei na vosa;
■ROKOVA na itaukei ni vanua o Rotuma, mai na yanuyanu o Rotuma, na nodra taukena na kedra qele, nodra itovo, ivakarau kei na vosa;
■ROKOVA na kawatamata era mai cakacaka mai Idia ni se qali tu vakaPeretania, kei na Pasifika, na nodra itovo, ivakarau kei na vosa; ka
■ROKOVA na kawatamata era mai tiko e Viti, na nodra itovo, ivakarau kei na vosa;
■TUSANAKA nida sa kai Viti eda sa duabau na umatamata.
Qori na ivakadinadina ni keda itukutuku. Eda tautauvata ena mata ni Kalou.
Eda na sega ni vakacala rawa na yavu e dabe kina na iKau ni Yavunivakavulewa.
Me vaka eda sa vakaraitaka oti ena yabaki qo, eda na kaukaua ga nida tu-vata.
Na gauna vakasiganisucu qo, e vakananumi keda meda ciqoma na lolomasoli wale ni Kalou.
Eda kalougata vakalevu nida vakaivotavota taucoko ena loloma soli wale ni Kalou.
Sa dodonu meda vaka-vinavinaka-taka na yalo ni noda rawa ni bula veimaliwai, na veirokorokovi kei na noda tiko veilomani e dina ni tiko na veika eda duidui kina.
Ena gauna ni Siganisucu, meda bulataka na ivakavuvuli levu ni nona mai liatamata na Kalou, oya meda dau veilomani ka solia taucoko na noda vakanuinui vua.
GAUNA NI BOLEBOLE
Ena gauna bolebole qo, meda vakasulumi keda ena ivakarau ni nona bula na Karisito baleta ni gadrevi sara vakalevu.
E sotava o vuravura na dredre ena veiyabaki sa oti ka vaka tale ga kina o keda e Viti.
E levu na bolebole eda sotava tale ga ena loma ni yabaki sa oti.
Na bolebole levu duadua, na kena dewa vakayauyau e Viti Levu kei na veiyanuyanu volekata na COVID-19, ka vakatekivu ena vula o Maji.
E sega ni dua na ka me tawasei keda ni dua ga na keda meca eda valuta tiko, eda sa kila na kena dina mai na veika sa yaco oti, ka dau vunau taka na Karisito, nida sa dua ga na uma tamata ena mata ni Kalou.
Ena noda marautaka na nona mai sucu nai vakabula, meda na vakadeitaki keda ena nona vosa.
Ka yaga ena veivanua kece, ena duidui taba gauna kei na kena ivakarau ni bula.
Na nona loloma sa rawa kina vei keda meda lomani ira na wekada ena duidui tagede ni bula eda bula kina.
Dina ni levu na cagi ni veisau eda sotava kei na kena bolebole, ia sa tiki ni noda bula meda dau loloma, dau veiciqomi,
meda nuitaka na veika vinaka ka buluta na ca. Na itukutuku ni Siganisucu, na loloma.
E tukuni ni ivurevure ni bula na loloma, ke sega na loloma e sega na bula.
Sa gauna vinaka qo meda veirairaici ka wasea yani na noda loloma.
Ena vuku ni Matanitu, e tomani tiko na ituvatuva ni veiqaravi ena kena iokaoka vakailavo, moni maroroi kina kei na iyaubula ni vanua.
Keitou veiqaravi ni sebera na dewa ni matetaka, ena gauna e veidewavi kina, me yacova mai qo ni sa malumu na kena dewa.
E levu vei kemuni oni sa vukei kina ka oni se marautaka tiko na veivuke qori.
Keitou na tomana tiko na nodra vukei o ira na vakaleqai ena noda vanua, me kua ni dua me vakuwai ena veivuke.
Meda vakayagataka na gauna qo me yaga ina noda veivuvale, ena noda itikotiko, ena lomanikoro ena noda veiwaseitaka na loloma, dina ga ni levu na dredre eda sotava.
VAKATATABU NI COVID-19
E dodonu meda na maroroa na vakatatabu ni COVID-19, meda na toka veiyawaki ena gauna ni marau qo.
Na veidewavi ni COVID-19 e Taveuni ena macawa qo, eda sa vakananumi kina, ni se rawa tiko ga ni ravuti keda na mate qo.
Dina ni sa levu na vakatatabu e sa laveti, e dodonu meda na tataqomaki tiko, nina rawa ni vakaleqa na gauna ni marau qo na mate kevaka eda sega ni kawaitaka.
Meda nanuma tiko ni vinaka cake me vakadaroi na soqo mai na kena vakaleqai na bula.
Vei ira na sega ni cula, na Siganisucu qo ena duidui mai na vei Siganisucu sa oti.
Levu era na sega ni sota vakavuvale se tiko ena soqo vakavanua, vakabibi na soko i yanuyanu baleta nira sega ni cula.
Ena kena basika tale na Omicron, au sa vakamasuti kemuni moni veisautaka na nomuni vakatulewa.
Ni cula me maroroi kina na nomuni bula kei na nodra bula na wekamuni.
E levu vei keimami na cula e sega ni tarai keimami na mate, se me keimami vakila na revurevu ni cula.
Keimami se bula vinaka tiko ka vukei ira era vakaleqai.
Keimami sa vakayagataka na walewale vou eso ni soqo ena gauna ni marau ni Siganisucu.
Qo tale ga na marau keimami vinakata me wasei yani vei kemuni. Keimami na dau nanumi kemuni, ena wasei ni tukutuku ni loloma i Karisito, ka vakadeitaka na noda veilomani kei na noda taqomaki.
Keitou na tomana tiko na cakacaka ni vei vakaduavata taki ena yavu ni loloma ka uasivita na ka kece ga.
Na nomuni Matanitu ena dei tiko ena inaki qori.
Ni tomani au ena kena tutaki na loloma dina.
Me vakalougatataki keda na Kalou. Ka me vakalougatataka na noda vanua.