Bolebole sa tu e matada ena yabaki vou oqo meda tara cake na noda bula kei na bula ni noda vanua lomani o Viti
Eda sa yacova tale mai e dua na yabaki vou, 2022 ka kauta vata mai na kena bolebole ni qaravi tavi. Nai tavi levu taudua na noda tara cake tale na noda bula kei na bula ni noda vanua lomani o Viti.
Sa da mai vakanadakuya na yabaki 2021 - na yabaki e rawa nida kaya ni dua vei ira na yabaki voravora ena i tukutuku ni vei gauna kei Viti.
Na mate dewa na COVID-19 ea mai ravuravu ka vakamatea e 697 na lewenivanua.
E a vakavuna na sega ni cakacaka, leqa ni bisinisi, kakana kei na veitosoyaki.
Oqo se qai bau levu e mate ena dua na leqa tubu koso me tekivu sara mai ena 1875, na yabaki a veitauvi kina na misila levu kara mate kina e sivia na 40,000 na lewenivanua, tautauvata e dua nai katolu ni wiliwili ni lewenivanua ena gauna oya.
E dai sa sivia na 800,000 na keda i wiliwili.
Eda kalougata nikua ni sa tu na wainimate me taqomaki keda mai na misila kei na vei mate dewa tale eso wili kina na COVID-19.
Ena gauna saraga oqo sa baci dewa totolo na COVID-19 ka sa tete yani ki Vanua Levu ka sa dodonu meda vakamuria nai vakasala ni Tabana ni Bula.
Ena i ka 4 ni Janueri sa na tekivu tale kina na vuli ena primary kei na secondary. O ira na gone ena Murivuli (Early Childhood Education) e nanumi tiko mera tekivu vuli ena i ka 10 ni Janueri.
E vinakati meda qaqarauni baleta sa veitauvi tiko na COVID-19 vei ira talega nai tabagone.
VAKARAU NI VULI
Ena gauna oqo sa dodonu mera vakarau vinaka tu na noda gone mera tekivu vuli.
Kena i balebale sara vakarautaka kece nai tubutubu na gacagaca kece ni vuli mai nai vola ni vuli, beki ni vuli kina isulu ni vuli kei nai vava.
Sa sega ni dua nai ulubale mera sega ni lai vuli na gone ena i ka 4 ni Janueri.
Ni sa toso vinaka na vuli sa na vakadeitaka tiko na noda i lakolako ena yabaki.
Na vuli ena vakararamataka na noda toso ki liu.
VEIDIGIDIGI LEVU
Sa da na vakanamata tiko na yabaki oqo kina vei digidigi levu ka sa toso cake tikoga na kaukauwa ni veisa vosa mai ira na i soqosoqo vakapolitiki.
Meda dikeva vakayalomatua na veika era kacivaka me rogorogo vinaka kara rawata kina na veitokoni mai vei ira na lewenivanua.
E dua na kena vakaraitaki na kena dau tukuni vakawasoma mai vua eso na dau ni politiki mai nai to ni veisaqa ni sa vakadredretaki na nodra galala na dau volai i tukutuku kei na domodra na lewenivanua.
Oqo e sega ni dodonu. E bula vinaka
Eda sa vakanamata tiko na yabaki oqo kina vei digidigi levu ka sa toso cake tikoga na kaukauwa ni veisa vosa mai ira na i soqosoqo vakapolitiki. Meda dikeva vakayalomatua na veika era kacivaka me rogorogo vinaka kara rawata kina na veitokoni mai vei ira na lewenivanua. tu na galala oqo. Keda raica na rua na niusiveva vakavalagi ena veisiga eda na wilika na ka era vola na lewenivanua, ena so na gauna era vakadiloya kina na Matanitu.
Oqo e vakadinadinataka ni bula vinaka tu na noda galala yadudua.
Ena yabaki oqo e ka bibi meda vakatulewa ena yavu ni dina baleta ena vukei keda me taucoko na noda digidigi.
Sa nuitaki ni na sobuti keda na nona veivakalougatataki na Kalou ka me yabaki vinaka mada ga na yabaki vou oqo.
ENA QAI TOMANI TALE YANI ENA MACAWA KA TU MAI