Lesu ki na koro kei na dua na ka vou
Na qasenivuli liu Apisalome Cola e vakacegu mai na koronivuli na Veiuto Primary School ena 2010 ka qai gole kina nona koro o Yadua, Gau, Lomaiviti ena yabaki 2021. Ena nona qai gole esa vakadeitaka me kauta e dua na ka e vou kina koro.
Ko ira na lewe ni koro ni ra lesu e tukuna o qasenivuli vakacegu Cola era dau kauta yani na nodra iyaya ni teitei me vaka na isivi, mataiva, sele, matau kei na so tale
Ia, kivei Cola e sa vakadeitaka ki lomana me na kauta yani e dua na ka e vou kina koro.
“Au via kauta e dua na ka vou ka rawa ni laki yaga kivei ira na wekaqu. Oqo na vuna au volia kina e dua na terekita vata kei na kena iyaya taucoko ni cakacaka.
“Me’u sa kauta yani e dua na iyaya vou me rawa kina na veisau ena koro,” e tukuna o Cola.
Ni bera ni qai lako kina koro o Cola era sa kila tu ni na kauta yani e dua na katavila.
Na waqa e kauta yani na nona terekita ki Gau e kele ena wavu e Nawaikama ena dua na Vakarauwai.
Ni sa draivataka na terekita ki Yadua, e tarovi mada e Nawaikama ka ra rovata.
E mai tarovi tale i Lele ena dua na nodra itikotiko na lotu kavitu. E dina ni nodra Sigatabu ia e tukuna o Apisalome ni ra tarovi koya ka ra rovata talega na terekita.
O Cola esa laki vakabulabukataka na bula vakaveiwekani kei na cakacakavata e nakoro.
Ko ira ena koro o Vadravadra era rovata talega ka vaka kina o Yadua na nona koro.
Sa tekivu siviyara na terekita ka tukuna o Apisalome ni nona jaji e $80 dua na auwa. Kivei era sega ni tu vei ira na ilavo e rawa ni ra solia tale eso ka me vaka na yaqona, vuaka kei na ka era rawa ni solia.
Era sa qai kila ni misini vou ni cakacaka e kau yani oqo e laki kauta tani na oca kivei ira ka levu na vanua e rawa ni cakacakataka ena loma ni dua na auwa.
Ena teitei na cakacaka levu taudua na kena vakarautaki na vanua ni teitei.
Eso era saumi tamata ena $50 dua na siga ka rawa ni vica na siga na nodra cakava na cakacaka.
Ia na terekita e rawa ni cakava na cakacaka oqo ena loma ga ni dua na auwa se lailai sobu.
Ena vale ni terekita e volai tiko kina e dua na vosa nei Ratu Sir
Lala Sukuna - Ena sega ni leqa na itaukei ke sega na kena, ena leqa ga ke sega na wekana.
E tukuna o Cola ni e liu esa dau kerei yani vei ira era tu ena vanua ni cakacaka mera me vakau kakana yani kina koro ia na gauna oqo era sa kerei yani ena koro mera vakau kakana mai ki Suva.
O Cola e dua na ka e sa laki vakabulabukataka na bula vakaveiwekani.
NONA VULI
E a vuli mai na Ratu Kadavulevu School ko Cola ka taura na tabana ni matai ia e sega ni vou vua ni sa mai teitei oqo e na koro.
ENA QAI TOMANI TALE YANI ENA MACAWA KA TU MAI