Rawati Vinaka na Bula mai na Volitaki Ika
Na matavuvale nei Sakiusa Rokoso mai Nakanacagi, Dreketi, Macuata e ratou sa rawata na nodratou bula ena volitaki ika ena makete e Labasa.
E ratou biuta mai na nodratou koro ena 10 na yabaki sa oti, ka tukuna o Rokoso ni vuni nodratou toki me laki qarava na nodratou vuli na luvena.
E rua na luvena e rau sa cakacaka tiko ena gauna oqo, na tagane e ovisa kei na luvena yalewa esa Health Inspector tiko mai Nadi.
“Koi rau ruarua oqo erau rawata na nodrau vuli mai na ilavo ni noqu volitaki ika,” e tukuna o Rokoso.
Sa qai vo tikoga e dua na luvena ka fomu va tiko ena gauna oqo.
E tukuna kina Siga Rarama o Rokoso ni bula e nakoro e rui bera vakalevu ni vakatautauvatana kei na bula ena koro vakavalagi.
Ena makete e Labasa e tukuna o Rokoso ni lewe 55 na dau volitaki ika ka ra yadua ga na teveli ka kena isau e $17.10 dua na macawa.
Na volitaki ika ena gauna oqo e toso sara tiko vakamalua ka namaki mena tosocake ena volivoli ena gauna ni tawase ni yabaki.
Ko Rokoso e sa biuta tiko vakatikitiki e $1000 na dola mena volivoli kina ena nona vakarautaki ira na gole yani mera laki volivoli ena siganisucu.
Na nona isau ni ika e tukuna ena vakatau mai na nona volivoli mai vei ira na dauqoli.
“Na noqu isau ni ika e tiko mai na $20 kina $30 na dola.”
E tukuna ni lavo vinaka sara e rawata mai na ika e vakau mai ki Suva me mai volitaki ena makete ka tiko ena Bailey Bridge ena Jerusalem Road e Nabua.
Ko ira oqo era dau solia ga yani na nodra ota ka saumi rawa nisa bera ni vakau mai.
Sa vakanuinui tu o Rokoso ni na vinaka na volivoli ena tawase ni yabaki ka sa na tu vakarau me solia na veika era gadreva na nona dau volivoli.
Mai na ilavo talega ni volitaki ika e tukuna o Rokoso ni saumi tale tikoga kina na nodratou rede ni vale e $250 dua na vula ka tiko mai Solove, Wailevu.
ENA QAI TOMANI TALE YANI ENA MACAWA KA TU MAI