Vakadonui me soli na laiseni vei ira nai taukei ni qereqere
Sa vakadonuya na Bose ni Yasana o Naitasiri me sa soli na laiseni kivei ira na taukei ni qereqere ena loma ni yasana.
E sa vakadonuya talega na Minisita ka qarava na kena soli na laiseni o Jone Usamate, ka kerea mera gole yani kina nona valenivolavola mera laki tomana na kena veivosaki ni volitaki qereqere me qai soli na kena laiseni.
Na yasana o Naitasiri e taukena e levu na qereqere ia e sega ni vakabisinisitaki mera rawa ilavo kina.
O Ratu Timoci Rokobukete nai liuliu ni Bose Vanua e Naitasiri e tukuna ni marautaka na lewa ni Bose ni Yasana ka vakayacori ena koro o Kalabu enai ka 16 ni Jiune.
E tukuna ni ra sa rui moce vakalevu nai taukei ni qereqere, ka ra solia vakarawarawa na kena taqei na qereqere kivei ira na dau ni bisinisi ena noda vanua ni sa soli kivei ira nai lavo.
Sa vinaka ni sa soli tiko nai lavo kivei ira ia e lailai sara ka dodonu mera vakalaiseni ka mera na vakaitavi vata kei na matanitu ena kena veivosakitaki nai sau ni qereqere.
Na taqei ni qereqere e tikoga na vanua e dodonu me vakayacori kina ka tiko na vanua e vakatabui.
E dodonu mera kila tiko nai taukei ni qereqere ni uciwai e taqei mai kina, e nodra iqoliqoli talega na lewenivanua.
E levu ga na qereqere e vakayagataki ena veivakatorocaketaki ena noda vanua e tukuna ni dau kau mai Naitasiri ka levu sara nai lavo era laki rawata kina na veikabani era laki vakayagataka, ni vakatautauvatani kei nai lavo era tara nai taukei ni qereqere.
Era sa kerei vakabibi na taukei ni qereqere ena loma ni yasana mera lako vua na turaga Minisita ka me rawa nira kila na veika kece mera muria mera rawa kina na nodra laiseni.
Sa kerei talega na yasana me volia na misini me vukea na kena taqei na qereqere ena loma ni yasana.
Ni sa tu vei ira na laiseni sa na tu talega kivei ira na kaukauwa ena kena vakatulewataki nai sau ni qereqere.
E levu na kabani era taqei qereqere tiko mai na uciwai e cala vakalawa tiko na ka era cakava ia era taqei qereqere ga.