Na Vosavosa Vakaviti

Edua na ka e dodonu meda maroroya na kawa iTaukei sai koya na noda vosa kei na tovo.

Oqo e rua na ka e vaka me sa seavu tiko yani vakamalua ka dodonu meda vakabulabulataka baleta ni oqo na keda itukuni.

E toka oqori era eso nai vosavosa vakaviti ka rawa ni da wilika ka kila na kena balebale dina.

TU NA INIMA LUVU NA WAQA

E dau cavuti ena dua na ka e tu ga vakarawarawa na kena iwali/iwali ni leqa qai sega ni vakayagataki, qai mani yaco kina na leqa.

Ni vakamacalataki na inima qo na iyaya ni waqa vakalomana me dau nimati kina na waqa.

E liu e dau sivi na kau mamada, ena gauna oqo sa vakayagataki vakalevu na qaloni se kava.

Ke sega ni vakayagataki na inima ka sa levu na wai ena luvu dina ga na waqa. E cavuti na ivosavosa oqo ni dau tu ga vakarawarawa na iwali ni noda leqa, da qai sega ni raica da qai oga tiko ga vakalevu.

ROBOTI KOYA TALE NA NONA KARIKARI

Sauti koya tale na nona ivalavala. Na karikari na gacagaca ni waqa ni Viti, na kau ni laca.

Na karikari e tu na kena e cake, karikari sila na kena e dau vakauta na waqa ni robota na laca na cagi.

Ke sega ni o qaqarauni na nomu taura na sila e rawa ni roboti iko na karikari, o qai mavoa kina.

Ni dua gona e sauti koya tale na nona ivalavala e qai tau vua na ivosavosa qo, tautauvata qo kei na ivosavosa lauti koya na sui ni kena.

WAQA KECE GA E BERA E SOQOVA NA LOA

O koya e bera e sota kaya na kena ca. Ena kena ivakamacala na loa e kena ibalebale na ca.

E vakaibalebaletaki ena nodra soko voli na waqa e wai, mera qai donumaka ni sa uku mai na loaloa, ni vakarau me tau na uca se me dua na draki ca.

Na loaloa gona oqo e ivakatakilakila ni dua na draki ca.

O koya gona ena gauna ga era na raica kina ni sa uku mai na loaloa, era na sasaga vakatotolo sara mera yaco i vanua, ka me kua ni donumaki ira na uca, se draki ca.

Ni dua gona e bera ena qai tau vua na ivosavosa oqo: ‘Waqa kece ga e bera ena soqova na loa.’

VAKANADAKU O ROKOLA, SA CA NA QALU

Na ivosavosa oqo e kena ibalebale sa ca se veilecayaki na cakacaka ni yali na kena dau.

O Rokola na nodra iliuliu na Mataisau na dau ta iyaya me vaka na waqa kei na veika tale e so.

Na iliuliu ni dua na mata tamata ni cakava e dua na ka.

Ni yali ga na kena dau e na ca se sega ni caka vinaka na cakacaka se na ka e caka tiko ni yali na kena dau.

Na qalu yacana raraba na vakalolo.

Qo me vaka ni dau caka na caka vakalolo ke na yali o kena dau e na caka vaka ca na vakalolo se qalu.

NIMANIMA NA VOKA

Na waqa vakawai, maca ga na wai sa voka. Na voka ni sa maca sobu na wai se sa mati.

Ni dua na waqa e mimi ni lako tu iwai e da na nima tiko ga.

O koya gona na dede ni noda nima tiko oya qai maca ga na wai ni sa voka.

VAKAUCUUCU NI CAMA

Nona wale na rogo vinaka ena nodra buno na tani.

Na cama ena waqa ni viti e tu wale tu ga me vukea na cici ni waqa.

O koya gona meda kua ni rawata na noda bula mai vei ira na tani me vaka na cama ni waqa ni Viti ena kena tu wale tu ga.

VODO I CAMA

Vaka baubau se vakawiliwili wale tu ga, toka wale ka vakarorogo. Na cama e gacagaca ni waqa ni Viti e vukea na kena nawa se cici vakadodonu.

Ni da vodo eda vodo ena dago ni waqa ni Viti e sega nida vodo ena cama.

Na cakacaka kece ni soko ena caka ga ena dagoni waqa vaka Viti. Ni dua e vodo i cama e vakawiliwili wale tu ga ena soko, toka wale toka ga ka vakarorogo vei ira era cicivaka tiko na waqa.

Ni dua gona e vodo e cama e sega ni cakava na cakacaka ni soko, e vodo wale tiko ga.

VUREVURE NI TUKUTUKU: TABAKACAKACAKA ITAUKEI

Biuta Vata: MAIKA BOLATIKI