Solia o Ro Teimumu e dua na i cegu vou vei SODELPA me tu mada vakawawa na nona cegu mai ena politiki
Eso era kaya ni oqo e dua na i tukutuku vaka mata ni davui. O ya na nona sa vakadonuya na Marama Bale na Roko Tui Dreketi, Ro Teimumu Kepa, mesa tu mada vakawawa mai na politiki.
Era a vakaraitaka ena vanua o Rewa ena dua na gauna sa oti na nodra sa na cegu tiko mai na Bose Lawa kei na politiki - kena i balebale nira na sega tale ni tu ena veidigidigi.
Ia ni toso tiko na gauna sara raica na lewe ni soqosoqo ni SODELPA na gogo ni vakavakarau kina veidigidigi - vakabibi mai vei ira na lewe ni Soqosoqo ni Marama.
Era raici koya cake tu baleta na nona dau tokoni ira ka dau valataka na ka baleti ira na marama raraba.
E ra a sagai koya tiko e na dua na gauna balavu me veisautaka na nona lalawa me sa cegu. Era lai tini sara kina Vanua o Rewa ka kerea na nodra veitokoni kei na veivakalougataki me tu tale o Ro Teiumumu. Ni sa soli mai na veivakadonui sara lai tini tale vei Ro Teimumu ka vakaraitaka nisa caramaki oti na gaunisala sa qai vo ga na nodra vaka io.
Sa mani dua vata kina na Marama. Era sa solia vei SODELPA e dua na kaukauwa vou. E so era kaya tiko me yalo vinaka o Viliame Gavoka me solia na nona itutu vaka iliuliu ni soqosoqo vei Ro Teimumu.
E levu na lewe ni soqosoqo era vakataroga tiko na nona veiliutaki o Viliame Gavoka baleta ni vugona tiko nai liuliu ni Tabana ni Lawa (Attorney-General) o Aiyaz SayedKhaiyum ka vunivola levu talega ni soqosoqo na FijiFirst.
E vakavuna tiko na loma tarotaro ena loma ni soqosoqo dina ga nisa vakamatatataka sara vakavinaka o Gavoka nina sega ni bosoka vata na matavuvale kei na politiki.
E na gauna oqo e rau veilecavi qaqa tiko na veivugoni ena vakatutu nei Gavoka kei SODELPA mera kua ni saumi curucuru kina vuli torocake (tertiary or university) o ira na gone vuli.
E rau vei coqacoqa tale tikoga e na vakasama me tara e rua na valenibula vou, dua e Nasinu, ka dua mai Nadi.
E na nodra vakatarogi na lewenivanua se na i soqosoqo cava se liuliu cava era vinakata me civivaka na matanitu ni oti na veidigidigi, sa lutu sara i ira nai tutu nei SODELPA kei Gavoka.
Oqo e se qai matai ni gauna me lutu vakaca o SODELPA.
E rua na vuna. E dua na tawase ni soqosoqo. E dua na ito e liutaka o Ratu Naiqama Lalabalavu. Nai karua e rau liutaka na peresitedi ni soqosoqo o Ratu Epenisa Cakobau mai Bau kei Ro Teimumu. E tukuni ni o rau nai vakadei ni duru e tara tu kina na vale o SODELPA.
O Ratu Naiqama, na Tui Cakau, sa na vakarau lade kei ira na nona i lala kina i soqosoqo na People’s Alliance e tauyavutaka ka liutaka talega ni oti na nona biuti SODELPA.
E ra sa maqusa tiko na lewe ni SODELPA e na i tukutuku baleti Ro Teimumu.
Oqo sa kena i karua ni gauna mera veisautaka na nodra lalawa na Marama.
E na matai ni gauna ni se bera na vei digidigi ena 2018. Era sa vakaraitaka kina Vanua o Rewa nira na sega ni tu tale ena veidigidigi. Oqo ni oti na nodra vakadiloi ka vakasewasewani e na loma ga ni soqosoqo ena gauna era liutaka tiko kina.
E a tekivu na kena tabaki na Gaunavinaka Report ka vakadiloi kina vakaca, ka tukuni mesa cegu. Muria mai na veisau ni Yavu ni Vakavulewa (constitution) ni soqosoqo ka vakalawataka me sa cegu baleta ni a sega ni qaqa na SODELPA ena veidigidigi 2014. A vakavuna na tawase ni soqosoqo me yacova sara mai e na gauna oqo.
Era a vakila na tarabi ni veika a vakayacori vei ira kara sa nanuma mera sa cegu.
Ia era a qai vakamasuta na Marama
na turaga ni vanua o Rewa me tu tale ena veidigidigi. Era a ciqoma na kerekere ni Vanua ka tu tale e na 2018 ka rawata na nona i dabedabe kina Bose Lawa.
Vakamuri koya o Ratu Naiqama ka veisautaka na nona lalawa me sa vakacegu.
E sega ni macala de na vakamuri Ro Teimumu tale ena veidigidigi oqo.
Sa dua na ka na nodra marau na leweni Soqosoqo ni Marama e na SODELPA ni sa na tu tale ena veidigidigi oqo o Ro Teimumu.
Era raici koya cake tu baleta na nodra dau tokoni ira ka dau valataka na ka baleta ira na marama raraba.
E ra a sagai koya tiko e na dua na gauna balavu me veisautaka na nodra lalawa mera sa cegu.
Sara vakacegu nisa rawa na lomadra.
Nai tukutuku baleti Ro Teimumu ena yavalati Rabuka kei na nona i soqosoqo.
Ke dua e ratou na taura vakabibi o ya o Ro Teimumu.
E vinaka tiko vei iratou me veiliutaki tikoga o Gavoka baleta ena vakadredretaka na toso nei SODELPA.
ENA QAI TOMANI TALE YANI ENA MACAWA KA TU MAI