Vakavotukana nai Yalayala
Ena 2018 era a yalataka kina na tabagone ni Levukaigau, Gau mera na vakailavotaka na tara ni vale ni nodra ivakatawa ni lotu Wesele.
Sa tekivu tara na vale ka vakayagataki na nodra lavo ni yaqona nai tabagone.
E tukuna mai na mata ni tikina o Sawaieke kina Bose ni Yasana o Lomaiviti o Kelepi Delai Mataitoga, ni a laki vakaitavi ena kena vakasobu duru nai Talatala Qase ni Tabacakacaka ni Lotu Wesele o Sawaieke o Ilaisa Tulele.
Na kena matai o Vata Lui e dua tiko na nona bisinisi ni tara vale Suva ka gone ni Nawaikama.
E tukuna o Mataitoga ni na dua ga na vula na kena tara na vale me vaka ni sa vakadeitaka o Lui.
Sa tuki na kava ena dela ni vale ka tukuna o Mataitoga ni sa na lesu tale ki Suva o Lui ka na qai laki vakauta tale mai e dua na matai me mai vakaotia na vale.
Na vale oqo ena rauta ni $30,000 na kena isau.
Era a tei yaqona na tabagone ka ra sevutaka ena yabaki ena rua na yabaki sa oti. Na kena ilavo sa tekivu tara kina na vale
ka ra na qai cavu yaqona tale ke gadrevi eso tale nai lavo.
E tukuna o Mataitoga ni ko ira e Levukaigau era a vakamuria nai tuvatuva ni tei yaqona ka me rawa kina ni ra na milionea (Rural Millionaire) ka vakaitavi kina na lotu, vanua kei na lotu.
Nai tuvatuva oqo e qai kauta na turaga Talai ena Tokalau sa mai vakacegu o Luke Moroivalu me vakayagataki ena veiyanuyanu kei na koro ena Tokalau ni noda vanua.
Ko ira na veikoro e Gau era sa vakayagataka tiko na porokaramu oqo ia era veisautaka eso na ka me rauti ira.
Na tei yaqona oqo e sa tiko vata talega kei na veika era yalataka mera na volia ni sa cavu na yaqona.
Me yaco na nodra tatadra e vakatabui me cavuti koso na yaqona ka ni sa vakatabui talega vakalotu.