Dredre meda rawa ni tukuna o cei ena qaqa ena veidigidigi sa roro tiko mai
Era sa dui kacivaka na vei soqosoqo vakapolitiki na nodra ile me baleta na veidigidigi sa roro tiko mai.
Ena gauna mada oqo sa dredre dina meda rawa ni kaya nina qaqa e dua nai lawalawa.
Na vuna oqo – sa rui levu na tata wasewase.
E rau sa cakacaka vata na ‘The People’s Alliance’ kei na ‘National Federation Party’ me rawa ni ratou na rawata kina na qaqa. Oqo na nodratou vakabauta.
Na PA ena dretaki ira mai na iTaukei ka na tauri ira vata mai na wekada na Idia.
E rau sana cakacaka vata talega na SODELPA kei na Unity Fiji.
Na nodrau nanuma ni na vakakaukauwataka na nodrau sasaga me rau rawata nai wiliwili ni dabedabe ena Bose Lawa me rau na cicivaka na matanitu.
Sa qai tiko na FijiFirst ka vakabauta ni rawa ni cici taudua ka rawata na qaqa me vaka ea rawata ena 2014 kei na 2018.
E sana dredre cake sara ena veidigidigi oqo.
Na Fiji Labour Party, We Unite Fiji Party nei Ratu Tevita Makutu, na Ka Levu mai Nadroga, kei na New Generation Party nei Varinava Tiko era na wasea talega nai digidigi (votes).
Kena i balebale ni sana bau dredre vua e dua nai soqosoqo me rawata nai wiliwili levu taudua (majority) me rawata kina na qaqa.
E rawa nira cokovata ni oti na veidigidigi e vica vata na i soqosoqo mera yacova nai wiliwili e gadrevi.
E kaya nai liuliu ni SODELPA o
Viliame Gavoka ni ratou taketetaka e 28 nai dabedabe.
Oqo na nodratou lalawa, ia sana bau dua na kani veitalanoa vinaka.
Ena gauna mada oqo na SODELPA e sa tiko sara ena boto ni tuitui vei ira nai soqosoqo lelevu.
Ena vakadidike e vakayacora na Western Force Research ena Jiune e kunea ni o SODELPA sa lutu kina i ka ono ni tutu ka taura tu ena vula o Me na Fiji Labour Party.
E nanumi tiko nina kaba cake tale o SODELPA baleta ni sa curu tale mai o Ro Teimumu Kepa me na tu ena veidigidigi.
E so era kaya, kevaka e rau veisolisolitaka nai tutu o Gavoka kei
Ro Teimumu me liutaka o ira nai soqosoqo ena toso cake tale o SODELPA.
Eso vei ira na lewe ni SODELPA era kaya ni malumalumu tiko na cici ni soqosoqo baleta ni o Gavoka e vugona na Vunilawa (Attorney General) Aiyaz Sayed-Khaiyum.
E kunea na vakadidike ni sa liu tale nai liuliu ni Matanitu o Voreqe Bainimarama ka lutu sobu kina nai karua o Sitiveni Rabuka.
Tarava ena i katolu o Professor Biman Prasad, liuliu ni NFP. Ka kena i ka va o Mahendra Chaudhry mai na FLP.
E siviti rau mai o Gavoka kei Savenaca Narube mai na Unity Fiji.
E kaba mai ena i ka ono kina i ka va. Naba lima o Narube ka naba ono o Gavoka.
Na veisau e sa laurai tiko e vakaraitaka ni sega tiko ni matata nai tutu ni vei soqosoqo mai na dua na vula kina vula tarava.
E na vula o Me a liu tiko o Rabuka. E na vula o Jiune sa liu tale o Bainimarama.
Oqo e sega ni kena i matai ni gauna me yaco kina na veisau vaka oqo.
Namaka tiko nina yaco na veisau vaka oqo ni bera na veidigidigi.
ENA QAI TOMANI TALE YANI ENA MACAWA KA TU MAI