Vakadei ni Vuli na Lotu me Usutu Ni Bucini ka Qaravi ni Matavuvale

Na lotu kei na kena vakavulici na vosa ni Kalou mai nai Vola Tabu e yavu dei ni vuli. Tekivu sara mai ena loma ni matavuvale. Qai ra gole i koronivuli na gone era sa vakadeitaki tu ena nona vosa ni Kalou.

Kevaka e sega na lotu e rawa ni gogo na nodra vuli na gone.

Na Kalou e duru ni vuli - ena vuli me baleta na noda vuravura (secular) kei na vuli me baleta na nona vuravura na Kalou (spiritual) na bula vakayago kei na bula vakayalo (spiritual).

Ni rau qaravi vinaka na rua na tabana ni bula oqo ena qai taucoko na bula ni dua na tamata.

E tukuna nai Vola Tabu ni yagoda e vale ni Kalou baleta ni bula tiko kina na yalo ni Kalou.

Oqo na vuna bibi meda kua ni vakasausataka na yagoda. Ni sa tauvimate na yagoda e dau dredre meda masu se wili Vola Tabu. Dau vakatovolei na noda vakabauta.

Oqo talega na vuna levu eda dau vakasalataki kina me da dau kania na kakana bulabula kei na kakana draudrau, vakarauta na lewe ni manumanu, kana vuanikau vakalevu ka kakua ni gunuva vakalevu na wainimate ni veivakamatenitaki. E dodonu talega meda dau vakaukauwa yago.

Kevaka e bula vinaka tu na yago ena qai rawa vinaka sara na noda qarava na noda bula vakayalo. Ni o rau oqo e rau dau salavata, ke leqa tiko e dua, ena drakidrakita na bula.

Ni’da sucu mai ena vuravura oqo, nai cegu ni bula e solia vei keda na Kalou. Oqo na yalona kei na nona rarama.

Oqo nai solisoli e soli vei keda kece na tamata veitalia ga se mata tamata cava se soqosoqo lotu.

Na rarama oqo e dau vakauqeti ira na dau loloma se caka vinaka. Eso era sega beka ni lewena e dua nai soqosoqo lotu se era sega ni dau lai lotu vakawasoma, ia era tamata vinaka.

Eso era vinaka cake sara vei ira nai lai lotu tiko. Na ka e kauti ira tiko na rarama ni Kalou. Era yalomalua, yalomalumalumu, sega ni viavialevu, dau veivosovosoti, ka dau vakarorogo.

Era sega ni rere na vosa vakadodonu ka vosataka na ka dina ena veivakauqeti ni rarama ni Kalou e tiko vei ira.

Oqo na ka talei e rawa ni’da tuberi ira kina na luveda ena gauna era vuli tiko kina mera vakayaragitaki ira kina ena vuravura ni veivakatovolei kei na bolebole.

Nai vakavuvuli ni Kalou sai sasabai vinaka duadua vei ira na luveda se ena vei yasai vuravura cava ga era bula kina.

Dua na gone yalewa, a sucu ka tekivuna nona vuli e Viti, ratou toki yani ki Niu Siladi vaka matavuvale. Ena dua na siga ena nona koronivuli mai Niu Siladi, sa vakarau tekivu na nodra kalasi ni science e na fomu ono, sa qai lako vata na kosakosa.

E dua nai lawalawa dabe tiko e muri e rau kaikaila tiko. Curu mai o qasenivuli, dua na marama ni Sri Lanka, yago loaloa, ka tukuna vei ira na gone vuli mera vagagalu ni sa vakarau tekivu na kalasi.

Ea qai tau vei koya na vosa ca e tabu me tukuni e nai i tukutuku oqo. Qai tucake na gone yalewa ni Viti ka tukuna vei rau na gone yalewa vakasausa ni cala ka tabu na ka e ratou cakava.

E ratou qai sauma vei koya ka kaya: O cei o iko, suka tale e Viti.” Vakanadaku o qasenivuli ka lako tagitagi kina vale ni volavola nei qasenivuli liu.

Era kacivi kece mai na gone vuli ena fomu oya ka’ra vosataki, ka vakasukai ivale eso ka’ra vakaitavi ena rulaki nei qasenivuli. Sa qai vakavinavinaka o qasenivuli liu vei gone yalewa ni Viti kei rau na nona itubutubu ena nona itovo kei nai vakarau e koronivuli.

Oqo nai vakavuvuli ga a susugi yani kina e Viti ka vakadeitaki ena i vakavuvuli vakalotu.

Ena yabaki oya, a qai qoqota kece na gone yalewa ni Viti oqo nai covi kece ni science subjects ena fomu 6.

Toso sara me lai vuli vuniwai ka sa consultant (tabana sara e cake ni vuniwai) ka dau sureti mai e na vuqa na vanua e vuravura me lai vosa kina.

Na gone yalewa oqo e yavutaki ena lotu kei na noda itovo nai iTaukei me dau vakarorogo ka talairawarawa vei ira na qase kei ira na nona i liuliu.

Na rokovi ni qasenivuli e sega ni ka vou. E sega talega ni qai lai vulica e Niu Siladi.

E vulica ka vakadeitaki e na gauna ea se vuli voli kina ena primary e Suva. Qai gole ki Niu Siladi sa kauta tiko vata kei koya nai tovo oya.

Nai talanoa oqo me vakayaloqaqataki keda nai tubutubu meda kua ni guce na qaravi ira na luveda ena buturara ni vuli.

ENA QAI TOMANI TALE YANI ENA MACAWA KA TU MAI