Tu Vakarau Ko Ratu Tomasi Me Qarava Na Vanua
Esa mai tawani tale nai tutu vakaturaga ena
Werelevu- i Nalagi ena koro ko Nawaka mai Nadi.
Oqo ni oti na nodra mai vakagunuvi ko Ratu Tomasi Kanailagi Naevo ena siga Vakaraubuka sa oti, me taura na itutu ni veiliutaki ena vanua me Tui Nawaka.
Esa yabaki dua na kena mai lala tu na itutu oqo. Ea taura taumada tiko mai ko Ratu Asaeli Driu Naevo me yacova na nodra mai bale ena i ka 13 ni siga ni vula ko Tiseba ni yabaki 2021.
Na nodra itokatoka o Wawaitu, mataqali o Nalagi ena yavusa o Noivunatoto.
Esa yabaki 55 ko Ratu Tomasi ka gone vei Ratu Asaeli. E vakawati vei Esiveli Ruba ka rau sega ni vakaluveni.
Ena siga ni nodra buli, esa vakadeitaka ko Ratu Tomasi ni sa tu vakarau me veiliutaki ka qarava vakataucoko na vanua, ka mera na tomana tiko ga na veika vinaka esa biuta tu mai ko Ratu Asaeli.
Ko Ratu Tomasi e i ka ciwa ni Tui Nawaka me taura nai tutu oqo, ka na qarava e 12 na yavusa.
Era vuli mai ena Nawaka District School ni bera ni’ra lai vakacavara nodra vuli ena Ratu Kadavulevu School.
E turaga dau teitei ko Ratu Tomasi. Era dau teivaka na dovu kei na so tale na kakana draudrau, e levu na gauna era dau tu ga mai Namulomulo na vanua e tiko kina na nodra iteitei.
Vakaraitaka o Mataiasi Nabau, na nodra gusu ni vosa na Qase-i-Werelevu Nalagi, ni’ra sa vakarautaka vinaka tu mai na soqo bibi oqo.
E kaya ni’ra na rokova ka doka tiko ga na nodra turaga ena gauna ni nona veiliutaki.
E vosa ni veivakadreti o nai Talatala Osea Tunidrau; e vakadeitaka vei Ratu Tomasi na bibi ni nonai tavi - sai koya me qara na bula vinaka vei ira na nona tamata sai koya na nona kaukauwa.
E kaya ko Panapasa Driu Qoro na nodra gusunivosa na Sauturaga ni bibi ka lagilagi na soqo ni veibuli ka a mai vakayacori.
“E dina e levu na veisau esa curuma tu na noda vanua nikua, ia e sega ni veisau na itovo ni veiqaravi kei na vakamenemenea na nodra turaga.”
Era osota yani na veiwekani na soqo ni nona vakagunuvi me ra vakadinadinataka kina ni sa na dabe dei tale na bilo.
E lima na koro e tiko ena tikina ko Nawaka, wili kina o; Nawaka, Namulomulo, Vatutu, Yavuna, kei Tubenasolo.