Toso Vinaka na Volitaki Senikau nei Rigieta
Ena vula oqo, era vakila sara vakalevu na dau volitaki senikau ena makete levu o Suva ena nodra gole yani vakayauyau na lewenivanua kei ira na vei bisinisi lelevu ena noda vanua mera laki voli ka ota taki senikau.
Era mata mamarau na dau volitaki senikau baleta ni’ra kila ni dua na ilavo levu era na rawata me vaka ni’da vavaca tiko yani na gauna ni marau ni Siganisucu kei na tawase ni yabaki vou.
E levu vei ira era sana tuvatuvakataka rawa tu na vanua mena vagolei kina na ilavo era rawata. Eso nai lavo ena vagolei ena siganisucu oqo, vakatawase ka vaka kina na vakavakarau ni tekivu ni vuli ena yabaki vou.
Ia, na marama ni Moala mai Lau o Rigieta Takayawa, esa yabaki 15 na nona tuva senikau tiko ena makete e Suva, ka vakila sara vakalevu ena macawa oqo na levu ni lewenivanua era gole yani vua ka vaka kina na veikabani lelevu mera lai volivoli ka biuta na nodra ota ni senikau.
E kaya ko Rigieta e dau rawa ni rawata tiko e $200 ena dua na siga ke levu sara na volivoli se na ota era dau gole yani vua.
Tomana ka kaya ni levu na ota ni senikau e yaco yani vua ena macawa oqo me ka ni; mate, vakamau, valenilotu, kei na veivalenivolavola lelevu (office).
A tekivu nona tuva senikau mai ena yabaki 2007 na gauna se qai kalasi dua kina na luvena, me rawa ni qarava kina nona vuli.
Nikua esa yabaki 21 nona goneyalewa, ka sa nodrau ivurevure ni ilavo vinaka vakaveitinani na tuva senikau.
NA COVID-19
E kaya ko Rigieta ni sega ni vakayalolailaitaki koya na kena veitauvi mai na matetaka na COVID-19 ni a sogo tu kina na makete kei na veilakoyaki.
A qai qaravi ira toka ga na nona dauveivoli ena nona vale mai Qauia, Lami.
Esa vakayagataka sara ga na veisenikau e teivaka tu ena nona
yasa ni vale me sotava kina na nodra gagadre na dauvolivoli era dau biu ota yani ena gauna ni soqo, ka vakabibi ena gauna ni somate.
E a qarava rawa kina e levu na ota ni senikau ena loma ni yalanivanua e Lami ki Navua ena gauna ni sogosogo ni COVID-19.
E kaya ni se bera ni lakova e dua na vuli ni tuva senikau ena gauna e a tekivuna kina na nona bisinisi. E a tuvana saraga ena veika e kila ni na veiganiti kei na ota e vinakati yani ka vaka kina na veisenikau era sa tu rawa tu mera tuvani.
A qai lai lewena e dua na vuli ni tuva senikau ena vica na yabaki sa oti, ka kaya ni tosoya cake na kila ka sa tiko rawa vua ena kena cicivaki vinaka na nona bisinisi.
E kaya ni ra a lewe vica na marama era a tekivutaka vata na tuva senikau ena makete levu e Suva, ka lewe vica era sa takali yani, sa qai mai vo duadua toka ga o koya, ka sega ni dau vakataratutu ena gauna e dau qarava kina na nona bisinisi.
E dau tekivu ena veisiga ena va na kaloko me yacova na 10 na kaloko ena bogi na nona veiqaravi tiko ena makete. E dau volia mai na nona senikau mai vei ira eso na marama mai Naitasiri ka sa kila ni sa toso vinaka sara kina na nona bisinisi.
E veivakasalataki ko Rigieta kivei ira era gagadre tu mera tuva senikau ka tauyavutaka e dua na nodra bisinisi, mera tekivuna na ituvatuva ni senikau ena veisenikau ga era sa tubu tu ena nodra veiyasani vale ka mera qai laiva vua na Kalou na Yalo Tabu me liutaki ira ena cakacaka ni ligadra.