Tarai Viti e dua na cagi ni veisau vakapolitiki ena kena digitaki na Matanitu
Ese qai karua ni gauna mena liutaki keda e dua na Matanitu cokovata (coalition). Ia, e se qai matai ni gauna kevaka e tolu nai soqosoqo vakapolitiki e ratou cokovata me ratou Matanitu.
Ena siga Vakaraubuka, e ratou a dabe kina na mata bose na Management Board ni SODELPA ka ratou na digitaka se na ito cava vakapolitiki e ratou na cokovata me ratou Matanitu - na The People’s Alliance-National Federation Party coalition se na FijiFirst.
Ena gauna ea wiliki tiko kina mai nai tukutuku oqo, sa vakayacora oti na nona digidigi na Management Board. Na kena matai lailai ena qai tukuni yani ena macawa ka tu mai.
Oqo sa kena ikarua ni gauna me vakayacori kina na bose oqo. Ena matai ni gauna ena Tusiti, a digitaki The PA-NFP coalition na matabose ka 16 digitaka na PA-NFP ka 14 era digitaka na FijiFirst.
E sega ni duavata kei na gaunisala ea vakayagataki na vunivola levu ni SODELPA ko Lenaitasi Duru, ka vola e dua nai vola ni kudru vei Registrar of Political Parties Mohammed Saneem kei na Peresitedi ko Ratu Wiliame Katonivere.
A qai laurai ni so vei ira era tiko ena bose era sega ni dodonu mera lewena na matabose ka sa bokoci kina na digidigi oya.
Era yadrava na ovisa na vanua ni bose ena siga e nanoa me vakamuri na lawa ni soqosoqo.
Ena siga nikua sa na macala tu kina o cei sa matanitu ka a digitaki ena nanoa.
Ke sega sa na vo tale e dua na macawa me vakaduri kina e dua na matanitu. Ke se bera tiko ga ni rawa sa na qai vakatulewa na Peresitedi, ko Ratu Wiliame Katonivere. Ena kaciva e dua na Matanitu tu vakawawa me vakarautaka e dua tale na veidigidigi vou.
Ke sa vakadeitaki na Matanitu vou, esa na dabe na Bose Lawa ka sara na digitaka e dua na sivika kei na Paraiminisita.
Na veilecayaki nei SODELPA ena kena sega ni vakamuri na yavu ni vakavulewa ni soqosoqo e sega ni ka vou.
Sa dau yaco mai liu me yacova tiko mai ena gauna oqo.
E dau luluqa na veiliutaki ena kena vakaqaqacotaki na vakamuri ni lawa ni soqosoqo.
E dua talega na bolebole levu e tiko ena veisau ni yavu ni vakavulewa ni soqosoqo ka vakadonui ena 2016.
A mai vakadonui me vakalevutaki nai wiliwili ni lewe ni management board mai na ono kina 42, oqo era okati kina na mata mai vei yasana kei na vanua ni cakacaka. Na kena leqa ni dau dredre na nodra kacivi me vakayacori e dua na bose, ka vuni mai tadre tu kina na bose ena siga Tusiti.
ENA QAI TOMANI TALE YANI ENA MACAWA KA TU MAI