‘Veimaroroi na Kalou ena Vanua Keitou Veiqaravi Kina’
E dua na gauna talei ka na guiguilecavi dredre
Ni dua esa soli bula me tutaka ka kacivaka na vosa bula ni Kalou, e dodonu me na tu vakarau ena vanua esa biuti koya kina na Kalou.
Oqori na nona mala ni vosa o nai Talatala Maika Kitione mai na lotu Christian Mission Fellowship (CMF), ka se qai lesu mai Aferika kei na nona matavuvale ena rua na macawa sa oti ena vuku ni kau lotu. Ko Talatala Maika a solia nona bula kina lotu ena yabaki 1997. E kaya ni sega ni tadra tu ni na mai talatala ni soqosoqo lotu ena dua na siga.
“Ia au sa vakila ga ni kacivi au tiko na Kalou, baleta ni levu na cakacaka au sasagataka au sega sara niu lai rawata.”
A veikacivi na lotu me ratou lako vakavuvale ki Aferika ena yabaki 2016. E sega ni ratou tu vakasuka ena veikacivi ni Kalou.
E ratou a veitomani voli kei na nona lewenivale o Di Ciba kei na luvena goneyalewa o Olivia ka ratou lai yabaki dua ka vula walu i Tanzania me ratou rawa ni vulica na nodra vosa, vakila na veisau ni draki kei na veika e wavoliti ratou me rawa ni salavata ka veivuke ena nodratou veiqaravi.
E ratou a tovolea vakaukauwa me ratou vulica na nodra vosa kei na draki ni bula era lako curuma ena veisiga, ni bera ni vakadeitaki na nodratou ilesilesi me ratou na lai veiqaravi kina vanua o Malawi. O Malawi e kilai tu me i ka walu ni matanitu dravudravua e vuravura. Tukuna o Talatala Maika, esa yaco na gauna mera veikilai vinaka kei ira na iTaukei ni vanua me yacova na gauna e tekivu kina nodratou veiqaravi. E levu vei ira era sega ni kila se vanua cava e tiko kina o Viti ena mape kei vuravura.
E kaya ni tarai iratou ni levu vei ira na tu mai Malawi era se bera vakadua ni rogoca nai tukutuku vinaka.
“Ena vanua keitou veiqaravi kina, na lotu CMF e vaka me bula ga mai, oti mai mate tale. Keitou vakavinavinakataka na Kalou ni sa tu talega na veitokoni ena veiyasai vuravura ena kena tovolei me vakatetei na itukutuku vinaka. Keitou veisiko ena vei koro, keitou vakayacora na veika keitou vakabauta ni tiko kina nai soqosoqo lotu.”
Ena nodratou a lai tiko voli oqo, e ratou a lai sotava talega na veivaluvaluti, qo o ira tiko ga na iTaukei ni vanua.
“Keitou sega ni tu vakasuka se yalomalumalumu ena veika keitou sota kaya voli. Ia, keitou yalodei ena kena tomani ka kaburaki tiko ga nai tukutuku vinaka.”
E ratou a vakaduria rawa e vica na valenilotu ni bera ni ratou lesu mai.
VEIKA E SOTAVI
Tukuna ko Talatala Maika, ni’da kalougata vakalevu na kai Viti ena vanua eda bula tiko kina nikua. Eda vutuniyau ena bula ni veivosovosoti, veivukei kei na veirairaici.
Ia, me vakatautauvatani kei na bula e ratou lai raica mai Malawi, e