Duri Vou Tale na Valenilotu mai Mudu ni Oti na Vakacaca ni Cagilaba Ko ‘Winston’
Era marau na lewe ni lotu Wesele ena koro o Mudu mai Koro, ena kena sa mai dolavi rawa na nodra valenilotu vou ena i ka 19 ni siga ni vula ko Tiseba ni yabaki sa oti.
A mai tara vou tale na valenilotu oqo ni oti e ono na yabaki ni nona mai ravuravu ka vakacacana na cagilaba levu o Winston ena yabaki 2016.
Era a veitauriliga na lewenikoro ena kena vakaduri e dua na kena komiti ni tara ni valenilotu ka ra a vakaligaliga talega mai kina na lewe ni koro ko Mudu era tu vakacakacaka tu e vanua tani.
E a sa tekivu tiko mai na kena sasagataki na vakavoui ni valenilotu ni bera ni yaco na kena mai vakacacani ena cagilaba.
Tara ni valenilotu
E kaya na vunivola ni komiti ni yavusa o Matanimudu, o Eliki Vunileba, ni taura e vitu na yabaki na kena cakacakataki na sasaga ni tara ni valenilotu oqo me yacova na kena mai dola.
E a sobu na duru ni valenilotu ena ika 16 ni Me, 2022 ka sa mai dola ena ika 19 ni Tiseba, 2022. Na valenilotu
oqo e tara tiko ga ena yavu ni valenilotu makawa.
E a laki vakaitavi ena kena dolavi na valenilotu oqo na iTalatala Qase e Koro, ko Talatala Josefa Tikonatabua.
“Sa dau qaravi tikoga na lotu ena dua na vale ka sega ni vakacacani mai na cagilaba, me yacova na kena sa mai tarai cake tale vakavinaka na valenilotu oqo,” e kaya ko Vunileba.
Tomana ko Vunileba ni ra lewe levu na lewenikoro era a tiko vakacakacaka mai vanua tani era a tiko rawa ena dola ni valenilotu oqo me ra a mai vakadinadinataka na vakavotukanataki ni sasaga yaga ena kena sa mai dolavi rawa na nodra valenilotu me qaravi vakatabakidua kina na nodra sokalou.
Feedback:
ray@fijisun.com.fj@fijisun.
Na vuvale na Koroiyadi mai Igiladi ka ratou tiko talega ena na dolavi ni valenilotu vou mai Mudu, Koro.