Vakaqaqacotaki na Veiqaravi ena Veisiko nei Vasu
Etomana tiko na nona veisiko na Minisita ni Tabacakacaka iTaukei ko Ifereimi Vasu kina veivanua eso ka vakarurugi ena kena vakaqaqacotaki na veiqaravi e veisemati kina na Tabacakacaka iTaukei.
Ea sikova ena kabani ni vakatubuilavo ni iTaukei na Fijian Holdings Limited (FHL), veisiko kina koronivuli ni veivakarautaki mai Nadave, ka vaka kina na Matabose ni Lavo Maroroi ni iTaukei.
VEISIKO ENA FIJIAN HOLDINGS LIMITED
Na kabani ni vakatubuilavo ni iTaukei na Fijian Holdings Limited ea toso vinaka tiko mai ni oti na mate-taka na COVID-19.
Me vaka ga ni wase levu ni kawa iTaukei era vakatubuilavo tiko ena FHL, tukuna ko Vasu ni bibi vua me veisiko kina me rawa ni veitalanoa ka taura e dua na matata ni toso kei na veivakatoroicaketaki esa vakayacori tiko kina.
NADAVE
Ena nona a veisiko ena koronivuli mai Nadave ena siga Lotulevu ni macawa qo, e tukuna o Vasu ni dua na itavi levu, bibi e vakacolati kina
na koronivuli ena nodra vakavulici na kawa iTaukei era na veiliutaki ena veisiga ni mataka ka ra dodonu me ra vakarautaki vakavinaka.
Era veitomani talega ena veisiko oqo na vuvale levu ni Tabacakacaka iTaukei, Tovo kei na iYau Vakamareqeti.
Ena nona vosa tiko vei ira na ivakalesilesi e vakavinavinakataka o Vasu na veiqaravi ni Matanitu sa oti kei na veiqaravi levu era sa cakava tiko mai na daireketa kei ira na kena ivakalesilesi.
E kaya ni dua na gauna bolebole e da sa lako curuma ka dodonu me na tu vakarau kina na koronivuli ena nodra vakarautaki ena veiliutaki kei na veiqaravi na kawa iTaukei ka me dua na Viti vinaka. E veivakananumi na Minisita ni na sega ni biu ira na vua ni veiqaravi ka tomani tiko ga me rawa ni ra qaravi vinaka na kawa kei Viti. E vakasarasarataki wavoki ena koronivuli e Nadave na Minisita ena nona veisiko qo, ka a vakayacori talega vua e dua na veiqaravi vakavanua me kidavaki kina kei na nona vukevuke.
MATABOSE NI LAVO MAROROI NI ITAUKEI
Ena nona veisiko ena Matabose ni Lavo Maroroi ni iTaukei, a veivakararamataki vua na vunilewa
ni Matabose ko Aisake Taito, ena veika sa qarava oti tiko mai, kei na ituvatuva esa vakanamata tiko kina na Matabose.
E marautaka o Vasu na veika esa bulagoci kina, ka vakavinavinakataka na veiqaravi era sa qarava tiko mai na ivakalesilesi me baleta na veivakatorocaketaki vakauasivi ena vakaduri bisinisi kei na noda tiko vinaka na kawa iTaukei. Tomana ka kaya ni na rawa duadua ga ke ra cakacakavata na vuvale levu era okati ena Tabacakacaka iTaukei ka wili kina na Minisitiri ni Veika Vakaitaukei, Matabose ni Veikavaitaukei, Matabose ni Qele Maroroi, Matabose ni Lavo Maroroi ni Taukei kei na koronivuli e Nadave.
NA LAWA
E vakabibitaka o Vasu ni kevaka e dua na lawa vou ena vakaleqai ira na kawa iTaukei, ena dodonu me vakayacori mada e liu na veitalanoa se na ‘consultations’ ni se bera ni vakadonui.
Ena gauna oqo, e tukuna o Vasu ni nona Minisitiri ena vakamuria mada na iwalewale ni kena veisautaki na lawa ni qele ka vakatokai tiko na ‘Bill 17’.
E kaya ni bibi vua na veitalanoa. Kevaka era sa marautaka na lewenivanua na veisau ena vakaya