Na Veimate e so kei na Wai Vakaviti e Veiganiti Vata
Elevu sara na veimataqali mate eda sota kaya tiko nikua e rawa ni wali ga ivale. Oqo mai na kena vakayagataki eso na wai vakaviti era tu wavoliti keda.
Na wai vakaviti oqo era se vakayagataka mai ka veivakabulai vei ira na noda qase ka so era se vakayagataka tiko ga nikua.
E toka oqori era eso na veimate e dau veitauvi wasoma kei na wai vakaviti e salavata kaya.
VU
1) Mamai na drau ni tomole 2) Tuki na drau ni quwawa ka vakasaqari. Ni sa buebue oti, me qai vakadewataki ni bera ni soli me laugunu.
3) Tuki e rua na tolo ni ginger kei na rua na tiki ni garlic. Me vakawai ka vakasaqari ni bera ni vakadewataki, vakaliwaliwa vakalailai ni bera ni tawani ena tavaya. Me yarua nai taki ni kana ni bera ni gunuvi.
4) Yaca na ginger qai loba yani kina na moli karo. Vakadewataki ni bera ni gunuvi. Rawa ni rua se tolu nai sevuni ni kana ni gunuvi. 5) Me tuki na drau ni quwawa qai saqa. Ni sa buebue oti, me qai vakadewataki ka gunuvi me vaka na waibuta.
6) Musumusu na coboi ka vakasaqari. Ni sa buebue oti, me qai vakadewataki ka gunuvi me vaka na waibuta.
7) Vei ira na gone – Yaca e rua na tolo ni ginger, tuki e rua na tiki ni garlic ka loba yani kina na molikaro. Vakadewataki ni bera ni waki vata kina na honey. Me yarua nai taki ni kana ni bera ni gunuvi.
MOMOSI NI ISEMA NI YAGO, UA, SUI KEI NA NA VICIKO
1) Kari na toloni tarawau, ka vusoi ni bera ni vakadewataki me qai gunuvi. 2) Tuki na kuli ni vevedu, ka vusoi ni bera ni gunuvi.
3) Vusoi na drau ni vevedu ni bera ni vakadewataki, ka gunuvi.
4) Tuki na drau ni weleti, vusoi ni bera ni vakadewataki me qai gunuvi.
5) Masi na yago se vanua e mosi ena waiwai dilo.
MOSI NI TILOTILO
1) Me veiveisa na drau ni botebotekoro, veiqarayaki, mamai ka tilomi na kena wai, ka kaburaki tani mai na kosana.
2) Beti mai na drau ni tarawau, sava vakavinaka, Tilomi na kena wai, ka kaburaki laivi na kena kosakosa.
BATABATA
(Droga se kavakava na domo ka savu na ucu)
1) Me vusoi vakasosoko na drau ni botebotekoro, totodro, batimadramadra kei na rorogo. Gunuvi ni vakarau na katalau kei na gauna o vakarau moce kina. Me gunuvi tiko me bogi va. (Kena tabu na vuaka kei na lolo).
2) Me rau saqa vata na drau ni sasaqilu, kei na drau ni yaro, vakabatabata vakalailai ni bera ni gunuvi. Na levu ga ni nomu gunuva, na kena vinaka. Gunuva tiko na wai oqo me vula dua. (Kena tabu na niu kei na kakana damu.)
3) Kari na toloni uci wadamu davo i qele, bovo, yalu, tarawau, vusoi vata ni bera ni vakadewataki qai gunuvi.
4) Musu mai e va se ono na tolo ni wa vula, me tautauvata na kedra balavu, tuki, vakawaikatakata, laugunu me vaka na ti. Me se katakata toka ga me sa gunuvi.
5) Kari na tolo ni yalu kasei, beti
na drau ni molikarokaro kei na drau ni uci. Vakawaikatakata me qai gunuvi.
6) Me vusoi na drauni lobau/kovekove kei na drauni kalabuci damu, me vakarauta ga na kena wai ka gunuvi. Ke sega na na kalabuci damu e rawa ni vusoi walega na lobau.
7) Me musumusu na tolo ni yalu, me tautauvata na kedra balavu ka ra veiveisa. Me vakayagataki ga na tolo ni yalu e kabi tu ena vunikau, kua ni vakayagataki koya e lili. Me qai tuki na yalu, vuloni ka gunuvi.
Na levu ga ni kena gunuvi, na kena vinaka.
8) Me beti mai na drau ni vono kei na drau ni yaro. Mai saqa vata ka gunuvi ni sa liliwa se veirauti na kena katakata me rawa kina ni gunuvi.
Na ivurevure ni tukutuku: Na Tabacakacaka iTaukei