Vakamatataki nai tavi ni mataivalu kei na Matanitu ena nodrau veimaliwai
Me vakamuri ga na lawa. Oqo nai soqoni kece ni veitalanoa erau cakava tiko na iliuliu ni mataivalu, MajorGeneral Ro Jone Kalouniwai kei Pio Tikoduadua, na Minisita ni Home Affairs.
Taumada ea vakaraitaka raraba o Ro Jone na nona ririko e na kena vakamuri na lawa ena veisau esa vakayacora tiko na Matanitu cokovata (coalition) nei Sitiveni Rabuka. Na i tavi ni mataivalu me taqomaka na vakamuri ni lawa (rule of law) kei na Yavu ni Vakavulewa (Constitution).
E rabailevu nai tavi oqo ka vakayagataka na kaukauwa oqo o Ro Jone me cauraka na ka e tiko e lomana ka ririkotaka tiko.
E na dua tale na tabana, na mataivalu e vakarurugi ena Matanitu ena minisitiri nei Tikoduadua.
E na vakarorogo o Ro Jone vei Tikoduadua. Ia ena qaravi ni tavi, na mataivalu ena vakayacora na ka e kila nina taqomaki kina na lewenivanua kei Vanua o Viti.
E liu ea qarava tu na ovisa na taqomaki ni lawa ka qarava na mataivalu na taqomaki ni noda Vanua mai na meca mai taudaku. Ena gauna oqo sa qarava ruarua nai tavi oqo na mataivalu.
A kaya o Rabuka me kua na taqaya ena veika e cauraka o Ro Jone ka vakavuna na nona vosa na iliuliu ni mataivalu na ka e taba ena pepa baleta na vosa nei vuni lawa (Attorney General). E kaya na A-G ni rawa ni caka na veisau ena Yavu ni Vakavulewa.
Ia a kaya o Tikoduadua na sasaga mera vakacakacakataki tale na 400 na tamata cakacaka mai na Air Terminal Services kei na Fiji Airways era a vakacegui mai na cakacaka ena gauna ni COVID-19.
Ena gauna vata e yaco tiko kina na veitalanoa oqo e kuruseta tu na Vanua e levu nai tukutuku cacavukavuka e sega ni dina ka wili kina ni na vakarau yaco take e dua na vuaviri. E tukutuku lasu ka sa dodonu meda dau kua ni vakabauta ka da rogoca ga na vosa e tau mai vei ira na dau veiliutaki.
E vakadeitaka o Ro Jone nina dau tokona tu ga se taqomaka na Bula tugalala (democracy) kei na lawa (rule of law). E na gauna ga e raica kina nisa vakasausataki na lawa, Yavu ni Vakavulewa (Constitution) kei na gacagaca ni bula tugalala (democratic process), sa rawa ni yavala na mataivalu me vakadodonutaki nai lakolako.
Koya gona me ratou dau vakamuria ga na lawa na Matanitu vou veitalia ke taura e dua na gauna balavu.
Na kena leqa ni ratou via cakava na ka eratou a yalataka vei ira na dau veidigidigi ena loma ni 100 na siga. E dai sai ka 18 ni siga ena gauna eratou a curuma kina na nodratou valenivolavoka. Ke na i balebale sa vo e 72 na Siga. nemani.delaibatiki@fijisun.com.fj