Toso ena Cicivaki Bisinisi
E vakaraitaka mai ko Wati Vulaca e dua na lewe ni soqosoqo ni rawata tiko ga ena siga Vakaraubuka e nanoa e $3000, oqo ena ota ni voli masi, ibe kei na vei cakacakaliga tale eso.
Era marau na lewe ni soqosoqo ni marama mai Delaimakotu, Moala mai Lau, ka ra vakatikotiko i Suva ni sa toso sara tiko na nodra kila ka ena cakacaka ni liga, kei na cicivaki ni bisinisi. Era lewe levu era lewena tiko nai soqosoqo oqo, ka ratou lewe 10 na vakabulabulataka tiko ena yabaki oqo.
Na liuliu ni soqosoqo oqo ko Taina Mocevinaka, ka dau vakavulici ira ena so na cakacaka ni liga o Qalo Valenitabua.
E vakaraitaka mai ko Wati Vulaca e dua na lewe ni soqosoqo ni rawata tiko ga ena siga Vakaraubuka e nanoa e $3000, oqo ena ota ni voli masi, ibe kei na vei cakacakaliga tale eso.
“Na cava tale meda lai cakava i valagi, nai lavo ga e tu e Viti.” Tukuna ko Wati ni ra vulica na
talitali, kesakesa, Tie and Dye kei na so tale, na veika kece oqo era dau volitaka.
Na veika era vulica ka rawata mai era dau vakaraitaka ena nodra Soqosoqo ni Marama ni Yasana ko Lau.
Era dau tauri ota vei ira na tiko mai vavalagi. Levu na gauna e tukuna o Wati ni sa dau levu na ota e gole ka sa dau bera na ligadra na marama.
Nai lavo era dau rawata mai ena volitaki ni gatu vakatoga e dau vagolei kina soqosoqo, kei na veicakacaka ni liga tale eso era dau volitaka esa nodra saraga.
Ko Wati e biuta mai nona cakacaka ena yabaki 2009 ka sa cicivaka nona bisinisi cakacaka ni liga, ka sa vakadinadinataka tiko na kena vinaka me yacova tiko mai nikua. E veivakasalataki tiko vei ira kece sara na marama me ra vakayagataka vinaka na veika e tu wavoliti ira me nodra vurevure ni ilavo.
“Sa kua so na vucesa, e sega ni dua na ka vinaka eda na rawata mai kina. Na tamata ga e dau cakacaka ena kana, ka na marautaka tiko na bula ena veisiga.”