Vakananumi Me Ono na Siga
Esa vakadeitaki, ka tuva na kena ituvatuva ka sa mau ena ulutaga ni CIBITAKI NI VEILIUTAKI RAIYAWA ME BALETI VITI ka vakatabakidua saraga me baleta na turaga Talai sa Bale ko Ratu Josefa Lalabalavu Vanayaliyali Sukuna se na Ratu Sukuna Day ena i ka 29 ni siga ni vula ko Me.
Ena marautaki tiko me ono na siga me vakatekivu ena i ka 24 ni siga.
E vakananumi e na yabaki oqo na nodra bula, na i tavi e ra qarava me baleti keda kei na nodra a susu, ka qai veisusu e muri e na bula ni veilutaki.
E matalia ni da raica na nodra raiyawa na nodra i tubutubu turaga ko Ratu Joni Madraiwiwi ka vakarautaki koya e na dua na i tuvatuva ni veituberi vakatama. E ra a Roko Tui Ra tiko e na gauna koya ko Ratu Joni.
E a sasaga me ra vuli na turaga lailai, ka kau ki na Wairuku Indian School me vuli taumada kina. E tauyavutaka na koronivuli oqo ko Badri Marahaj e na 1898 me baleti ira na Idia.
E laki kauta mai o Maharaj e dua na Oxford graduate, Rev Charles Andrew me mai veituberi e Wairuku, ka qai yaco e muri me soli koya mai me qaravi Ratu Sukuna. E a qai laki vuli rawa ki Wanganui ka yaco sara ki Oxford e na nodra duavata na veiyasana, veivuvale vanua ka ra vakaitavi e na kena saumi na nodra i curucuru. E ra qai vakarautaka na nodra tuberi na noda turaga me ra veiliutaki ka veisosomitaki ka wili kina na Turaga Vunivale sa bale, Turaga Tui Nayau sa bale, Turaga Tui Cakau sa bale, Turaga mai Naisogolaca e ra sa bale kei na vuqa tale. E ra qai veitalanoataka na vanua sa dabe kina e daidai ko Vulinituraga me ra vuli kina na kawa Turaga me ra veiliutaki.