Na Tabekasere
Ena noda vei koro vakaviti e dau tu eso nai cakacaka ni liga ka’ra dau cakava o ira noda qase e liu.
Ena vanua o Navatusila era kilai tani na tiko ena vanua qo na kena tali na Tabekasere.
Na tabekasere e dua na iyaya makawa ni vanua o Navatusila ka ra dau vakayagataka na marama e Navatusila me ra dreketa kina na kakana mai na iteitei.
Era dau vakayagataka tale ga mera takitaki ki vei Tui Navatusila.
Na tabekasere na ketekete era dau vakayagataka na marama mai Navatusila ka dau tali mai na bitu. Na ketekete oqo e duatani mai vei ira kece na ketekete e viti kani vuqa vei ira na ketekete era tali ga na drau ni niu, voivoi kei na vau. E vuqa na vanua e dau vakayagataki tale ga na bitu ka tu yadua sara me qai vakayagataki na tolo ni bitu. Ia na vanua qo e vakayagataka na tolo ni bitu me tali kina tabekasere.
E dau tiko ga na bitu e vakayagataki me tali kina tabekasere me vaka na bitu dina, bituniviti se na bitu kau.
Ena noda vanua edau vakayagataki tale ga na bitu qo me tara kina vale, e dau ta kina na bilibili, e vakayagataki me vakatagi, e vakasaqari kina na kakana vakabibi na ura ni wai dranu ena lovo se na dela ni buka.
Eda dau vakayagataka tale ga me itawatawa ni wai, kau ni siwa, isele kei iyaya ni vakatagi me vaka na dulali.
Na tali ni tabekasere e via dua toka na cakacaka levu vei ira na marama ni Navatusila kani dau vaka gauna ga na kena dau tali. Ena loma ni dua na yabaki e dau caka ga vakadua na tali ni tabekasere, baleta na bitu e tiko ga na gauna e malumu kina.
Na vula ikawakawa e dau gauna vinaka ni tali tabekasere kani gauna qo edau malumu kina na bitu. E dau digitaki vinaka sara na bitu me vakayagataki.
E dau vinaka me vakayagataki na itagonibitu ka tiko na rua kina lima na senitimita na kena raba. E dau vakayagataki ga na itago ni bitu e tasogo ruarua na yasana. Ena kena tali edua na tabekasere e gadreva e lima na bitu me ruakina tolu na senitimita na kena raba, ka rua na bitu me va kina lima na senitimita na kena raba koya dau vakayagataki na kena suitu vakatokai na ililili.
Sa na qai lautuki na bitu ena vatu se dua na ka kaukauwa me rawa ni sei va. Sa qai lobi.
Ena draki mamaca e dau toni na ilobi ni bitu ena wai me vakamalumutaka. E dau tali tolu e liu mai na botona me vakamuria na ililili.
Na levu ni ililili ena vakaraitaka na ka levu ni tabekasere. Ni sa taki oti na otioti ni ililili, sa qai vakaoti na botona kei na vanua e cicila.