NRK lopettaa suomenkielisen lähätyksen

Ko Tromssan ja Finmarkun FMlähättimet suljethaan desemberikuussa, NRK:n liki 50 vuotta vanhaa suomenkielinen lähätys jää histoorihaan.

Ruijan kveeniliitto oon protesteerannu tämän takia. Europan raati oon kritiseerannu NRK:ta monta kerttaa siksi ko NRK:n kainunkielinen tarjous oon niin huono. Ennen se oli 15 minuttii ja nyt se oon tyhä 12 minuttii viikossa.

– Nyt tämän viimisenki lähätyksen lopetethaan. Se oon aivan väärin. NRK ei ole kuunelu meitä ollenkhaan. Met protesteerama tietenki ja aijoma raporteerata tämän Europan raatile, Ruijan kveeniliiton johtaaja Hilja Huru sannoo.

Luppaa plaanan kevhään aikana

NRK Tromssan redaktööri Pål Hanssen sannoo ette het alethaan nyt prosessin missä het hunteerathaan mikä olis paras tarjous kainulaisile.

– Meilä oon erityinen velvolisuus kainulaisten joukkoo kohthaan. Met kattoma nyt kunka met saama parhaan tarjouksen meiđän kväänipublikummile. Mie toivon että met saatama vuođen lopussa sannoot ette meilä oon Kväänitten lähätys.

Hansen luppaa ette het alethaan työtelä tämän kans 1. februaarikuuta, ja ette plaana oon valmis kevhään aikana. Hänelä oon ittelä muutamppii ajatuksii tästä. Hän ei esimerkiksi halluu ette kainunkielinen eli kainulaisile meinattu lähätys kuuluis raadioissa koko maassa.

– Se ei ole aktuellii, hän sannoo.

Hän meinaa ette lähätyksellä ei olis ommaa lähätysaikkaa vaan kuulija saattais lastata sen alas ja kuunela missä ja milloin itte halluu. – Mie uskon ette nuoret kuulijat haluthaan tätä, hän sannoo.