Chol belle et pi ch’bétail (6/8)

Éj vos foais peur, j’él voés, qu’il o rinfitchè ch’Bétail. O dvez pinser qu’éj sus rudemint laid : laid à foaire peur.

J’én vos dirai point l’contraire, pasqué j’én sais point mintir. Mais j’sus seure éq din l’fond, vo tchoeur il est boin. J’él sins.

Et pi conme o pindant des jours et pi des jours : al s’assiyoait pour minger, pi l’eute i ll’erbéyoait aveuc ses zus qui li matchoait’t és fidjure, et pi s’bouque in tchu d’glaine.

Janmoais i n’avoait inséyè d’li foaire du mau. Meume éq si al avoait peu l’vir, tout seu, din s’cambe, quante i llé tchittoait, a s’éraoit aperchu éq din l’noér, tout duchmint, i bréyoait.

Et pi un soér, qu’al étoait in route à s’papeter aveuc inne flamique à poérions qu’al boaignoait din dol crinme fraique, éch Bétail i s’a appreuchè d’chol Belle :

Belle, o volez-ti vos mérier aveuc mi ?

Belle a nn’o ieu un suriot, sin sifflet pi sn’appétit copè :

Nan, j’én veux point, qu’al o racachè, in tran-nant. Oz éte éd trop laid !

Ch’Bétail il o sintu conme conme un coeup d’coutieu din s’poétrin-ne, conme un coeup d’martieu din s’chervelle. Sin tchoeur qui s’détchiroait.

Bonsoér, boéne nuit, qu’il o mangon-nè in s’seuvant pour aller mucher ses lèrmes et pi s’tristèche….

(à suire ésmaine tchi-vient)