Chol belle et pi ch’bétail (7/8)

Pindant troés moés, tous les soérs, ch’Bétail il o rnmandè à Chol Belle si qu’al vodroait s’mérier aveuc li. Et pi tous les soérs, l’eute a li rclatchoait qu’a n’voloait point, qu’il étoait d’trop laid.

Portant, din s’tête, inne foés coutchèe, a s’erpreuchoait d’li foaire du mau, d’li foaire tellemint d’mau à sin peuve tchoeur, qu’al sintoait finalmint si rimpli d’tindrèche.

Et pi, un bieu jour, ch’étoait l’boin temps : chés moénieux i cantoait’t, pi chés roses i s’épénichoait’t, Chol Belle al o dit qu’al aimeroait bien rtorner à s’moaison, ervir sin pére, pi tous ses gins. Qu’al s’in-nuyoait. Chol Bête al o sintu ses vein-nes, ses pomons qui s’vidoait’t. Mais a s’a rprins. Al o sarrè ses dints, pour miu mucher s’détrèche. Pi al o rinfitchè qu’al voloait bien.

A inne condition : qu’a rviènche, huit jours pu tèrd :

Passez cht’énieu-lo à vo doét, et pi dmain, o srez à vo moaison. Din huit jours, ertirez-llé, et pi o rvarez ichi, conme pèr inchantemint.

Belle al o pronmis. Rintrèe à s’moaison, chés jours iz ont filè tellemint vite, al étoait si continte, qu’a nn’o obliè s’pronmesse. Et pi inne nuit, al o foait un horribe coeuchemèr. A s’a dessatchè d’sin lit, pi al o inlvè chl’énieu magique qu’il étoait à sin doét.

Austôt, a s’a rtreuvèe à ch’catieu meudit. Épaveudèe d’peur, al o trachè, trachè, long d’él nuit,tout partoute, din tous chés piéches. Al o attindu ch’Bétail, qui n’évnoait point. Pi al o brai, al o brai… (à suire ésmaine tchivient)