Ech preume comte ed Ponthiu

Ch’est din un viu live musi pi à mitan matchè à seuris éq chétlos qui trach’t iz ont peu déteuper pour él premiére foés chl’ancien nom d’él ville d’Adville : « Abbatis Villa », éch qui voloait dire, din ch’perlage d’éch momint-lo, « él ville éd l’abbè ».

Chl’abbè in tchestion, ch’étoait échti d’échl abie d’Saint-Ritchier, forchémint, pis qu’chés moénes éd là-bos i possédoait’t échl’île, su la Sonme, à d’où qh’chés preumes cabénes d’Adville iz avoait’t tè atampies, au mitan d’chés mérais pi d’chés rosieux. Ech dotchumint i rmontoait à l’énèe d’éch bon diu 831.

Chint chinquante ans pu tèrd, in 981, Hugues Capet i rétchupérro chés rliques à St-Wary din chés greus à Arnoul Ech Maouais, éch comte éd Flan-ne ; i zzés ramaro pèr no bout in trécopant ch’Djé d’Blanquetaque, pi i zzés mettro au rados, in heut d’éch Cap Hornu.

Ch’est minme pour o, à ch’qu’o dit, qu’i varo roé d’France, in 987. Mais Hugues il avoait des crignons din s’tête, à coeuse éd chés Neurmands (chés « Vikings ») qui n’décessoait’t éd débartcher din leus batieux à têtes éd carimaros pi bricassis.

I vnoait’t, i pilloait’t, i brûloait’t, i tuoait’t, et pi i rpartoait’t din leus poéyis du Nord, in tchittant toute rousti, et pi ch’poéyi à tchuïa.

Ch’est à coeuse éd o, in pinsant à ch’qu’i porroait foaire pour défin-ne chol plache-lo, qu’Hugues Capet il o finalmint rtirè Adville à chés moénes éd St-Ritchier, in 990, pour n’in bailler l’governémint à sin bieu-fiu, Hugues éd Montreu (lo qu’chés reuts iz ont des tcheues conme min breus !)… (à suire ésmaine tchi-vient)