„Des Thema hot grad schu a enorms Gwicht“
Ach weisch, drähe kasch grad wie ´de wid, momentan isch schu a ziemle blede Zit! It fir ies, noai mir hends reacht aber gnüe ondra Lit goht´s grad wirkle schleacht. I mui die wo gend, fu do wo ´se kummed weil ´se wissed, sus weared ´se uf am Friedhof verummed.
Dicke, Dünne, Junge, Olde alle wend ´se zu ies ring gwollte. Kumme dind ´se fu iberall hea und weare dind es allad meah. Afoche dind ´se die Flucht meischtens ´z Füeß weil wer iberleabe will eigentlich glei gong mües. Widder goht´s in groaßa Käre aber bloaß in vohla, it in lääre. Iberleabe sottet ´se mit bloas uim Glas Wasser täglich, drum stearbed die meischte schu do gonz kläglich.
Nochad weared ´se in kleine Bootle khocked, in der Hoffnung dass ´se die schwierige Reise schu irgendwie rocked. Bloas wie viel fu deana Boot kummed heil bei ies a? Und wie viel sind uf offenam Meer mit stearbe drah? Unmenschlich doch leider wohr und drotzdeam seached do fu ies einige a groaße Gfohr. A die Lit mecht i mi iez a wink richte, ´de Neabel ´dr Unverständniss a wink lichte.
I mües glei als erschds ebbas sage zu der gonze Gschicht: Persönlich find i, des Thema hot grad schu a enorms Gwicht. Ahnung fu deam gonze ho i – des gib i ehrlich züe – leider eher weniger wie gnüe. Drum ho i amol a Frog an uib alle: Was dind mir der Wealt eigentlich grad fir an Gfalle? Isch es Leabe fu deana ondra Lit wirklich bloas a bedauernswerte Situation die ´s hold grad git? Sind die Flichtlingslit wo bei ies uf ´de Stroßa flacked wirklich bloas a Wettingsatz fir irgend an moarz mäßig tolle Schatz? Und wenn ja ka mir uina fu uib gschieda Lit sage, kinned mir des Ibergwicht an Wettingsätz denn iberhöupt no trage? Oder wie lüueged der Schatz denn bitte üs wenn irgendebbar drfu provitiert und ´dr Rest arm isch wie a Kirchemüs? Do dät mi iez nämlich ebbas interessiere: Däded dir eher flüchte, vor allem was isch oder ´s Leabe verliere wie a ufs Druckene gwoarfena Fisch? Die Lit sind ja nämlich it bloas bei ies weil´s ena do so güed gfällt, sondern weil’s bei deana vor ´dr Hüsdier jeden Tag no lütter schnällt. Dea Krieg wo bei deana grad isch, isch nix fir des du persönlich verantwortlich bisch aber drozdeam mües ´ba anond doch behilflich sing, weil was wenn der Krieg iez grad wär isa Ding? I verstond die soarga wo do üfkummed schu öü aber die Lit sind do,´ma ´kas numma ändre, des weiß doch a jeda gonz gnöü. Brobiere ´br doch des Problem a zum packe und lend die Flichtling it uf ´de kolde Bede flacke. Wär doch schad wenn ´ba ´de zweite Wealtkrieg deixled hot und des Problem iez uifach so hocke loht. Weil gstemmt hend mir schu gonz ondre Stui. Alle zähmed, it allui!
Pauline Faccini, 15 Jahre, Bad Hindelang
Die Jury meint Pauline hat sich mit einem ernsten und aktuellen Thema auseinandergesetzt und ihre Gedanken eindrucksvoll in Mundart wiedergegeben. Sie bekommt dafür 200 Euro.