Schorsch und die Frühjahrsmode
ENEUES AUS SCHWABLANTIS s isch jed’s Jaur des Gleiche. D’r Frühling kommt. Ond mit ihm glei dia modische Verbesserungsvorschläg von meiner bessera Hälft. I wär rein modisch g’seah völlig aus der Mode komma, sait se. Des gibt’s doch gar et! Ond weil i’s han komma sea, han i vorsorglich a poetische Antwort vorbereitet. Jetzt moinat vielleicht a baar, i wär net ganz dicht, aber liabe Leit – des schtimmt net. I bin sogar a Dichter!
Was interessiert mi dia Mode? Dia gat au mea vorbei.
Ond nau kommt a nuia, so isch des allawei.
Dolce und Gabbana kommt bei mir et in da Schrank.
Gucci und Versace – noi, dau sag i vielen Dank!
I gang zum Schoppa in d’Baywa, han mein Filzhuat auf’m Grend.
I brauch da Diesel im Bulldog ond koi Diesel-Jeans ...
Mei Gott nei, die Inge! Dia find des gar et guat.
Manchmal kot’sch fascht moina, dass sie sich schäma duat!
I brauch koin Hugo Boss net. I woiß selber, was i dua.
Ond dr oi, d’r Magergeld Karl, der hat a G’sicht wia a Schuah.
Dia ganze Modeschöpfer hand mi scho voll erschöpft.
I g’frei mi wia a Schneider, wenn i mei Holzfällerhemd zuaknöpf!
Die Leit, die guggat mi a wia von ma andra Schtern,
aber i han halt meine Gommischdiefel gern.
Mir kommt koi Sneaker an da Fuaß.
I han da Gommischdiefel-Blues! Alle guggat ganz bled, als ob i a Ufo wär!
Aber meine Gommischdiefel, dia dua i net her.
Ond jetzt han i da Pilz an meim Fuaß … und da GommischdiefelBluuuees.
Also nau – bis zom nägschda Mal! Eier Schorsch.