Schorsch und das 21. Jahrhundert

Kinder, wia dia Zeit vergat! Jetzt hammer’s scho mea 2018! Des Jaur in dem des Jahrhundert volljährig wird, sozusaga. Des hat mi nauchdenklich gschtimmt, also han I a weng nauchdenkt. Des isch fei gar et so schlecht ab und zua! Ond nau bin I z’maul auf a Idee komma: Vielleicht sollt I au mal ofanga erwachsa zum weara. Mei Inge hält mir ja fascht täglich vor, was I für a Kindskopf sei. Ja – des Kind im Manne, allawei guat für dia oina odr andra Panne! Erwachsa werra hoisst jetzt aber au et zwangsläufig, dass ma et ab und zua a Kindskopf sei darf.

Ganz im Gegadoil: Mir solltat ons sogar ab ond zua in d’Köpf von de Kinder neiversetza, moin I! Dau sieht dia Welt glei a weng anderscht aus, wenn ma se durch dia Äugla von so am kloina Schörschle ogucka duat.

Ond so a kloins Schörschle isch irgendwann au mal a richtiger Schorsch.Des bassiert wiederum schneller als ma gugga ko, unter Garantie no in deam Jahrhundert. Han I mir jedenfalls denkt. Ond nau han I weiterdenkt. Nach dem Motto: Wir schreibet des Jaur 2018 – no nia hat a Schorsch weiter denkt als heit.

Ond so bin I an dean Punkt in meiner Gehirngalaxis komma, an deam aus Schpass auf oimal Ernscht werd. Ond zwar net der Ernscht der jetzt vier Jaur alt isch, sondern der richtige volle ernschthafte Ernscht: Wia sieht des dau aus, in onserm eigentlich so scheana Schwablantis, wenn unser Schörschle dann a richtiger Schorsch isch (und I längscht morsch)?

Leabt der dann in am riesiga Maislabyrinth, ohne Schmetterling und Bienla? Unter schtändiger Angscht vor am oinazwanzigschta Jahrhunderthochwasser in rer Häuseransammlung, dia den Nama „Schdädtle“nemme verdient, weil’s dau koin Bäcker mehr gibt und au koin Metzger. Und somit au koi Leberwurschtbrot. Isch unser Schwablantis am End wirklich a oinzigs kollektives Outletcenter, gebaut um a zentrale Verkehrsinsel rom auf der a Franke sitzt ond uns alle regiert? A schwäbische Albträumerei, kennt ma fascht moina. Aber was isch jetzt dia Moral von deara Gschicht? Vielleicht dia: Was d’r Schorsch jetzt macht, verzeiht ihm des Schörschle vielleicht a mal ett! Des gibt’s doch gar et! sagat sie jetzt vielleicht. I moin, es isch et undenkbar und zumindescht denkwürdig!

Also nau – bis zom nägschda Mal!

Eier Schorsch