Schorsch und der Karne Wal

Liabe Leit, es war au des Jaur wieder a Naturereignis, des g’fährlichschde Säugetier der Welt aus der Nähe zum betrachta: Den Karne Wal.

Ond der verschluckt oin oft schneller als ma gucka ka! Alaf, Helau, Hio, vier Gschpritzte, Luftschlangenattacke ond Konfettiangriff direkt aus der Ritterburg, wo d’r DJ Ötzi mit 130 Dezibel sei grausams Regiment führt. Flankiert von drei Pirataschiffla ond oiner Schlumpfbrigade, dia et bloß äußerlich blau zum sei scheint. Sappralot – ond scho hängsch mitta denna in deam Gaudiwurm. Oder isch am End d’r Wurm denna in derer Gaudi?

I will jetzt nix madig macha, aber Gaudi isch ja im Prinzip nix anders als d’r Schpass an d’r Freid. Ond dia Freid will ja irgendwie erzeugt weara. Ond wia macht ma jetzt so a ebbes? Also traditionell nemmt ma dau so a Art Schtimmungskanone her. Dia ka ma sogar auf a Pirataschiffle montiera wenn ma will. Ond als Munition für so a Schtimmungskanone eignet sich beischpielsweise Humor ganz guat. Der darf ruhig a weng drogga sei. Sonscht zündet der net. Außer ma isch selber scho feucht ond fröhlich, dass ma beim Anblick der elften Ritterburg vor Freid auf seine Schenkel klopft. Des isch dann dia Art von Schenkelklopfer, dia in der Regel erzeugt wird von am jahrhundertealta Fips Asmussen Witz. Kombiniert mit am leicht falsch gschbielda Tusch im Zusammenspiel mit zwölf Gschprizte, dia ma zwischenzeitlich dann intus hat.

Von dau kommt ja au der Begriff „Voll auf die Zwölfe“, der von Humorpirata oft in Ospruch gnomma werd. Wirklich luschtige Fußgrüppla ond Wägala kommat am End allzu oft unter d’Räder von solche 500 PS ond ebensoviel dezibelhaltige Ritterburga. Mei, des gibt’s doch gar et – wia soll des bloß weiterganga? Guter Elferrat isch teuer.

Am End ka ons da bloß no a Faschingskomitee retta vor dem gefährlichschta Säugetier der Welt – dem Karne Wal.

Also nau – bis zom nägschda Mal! Eier Schorsch

Bei uns im Internet Ein Video zur Kolumne finden Sie unter guenzburger zeitung.de/schorsch