Schorsch und das Schtorchennest
LNEUES AUS SCHWABLANTIS iabe Leit, vielleicht isch es eich au scho aufg’falla: Bei ons gibt’s Schtörche. Mei, prima! Alle freiat sich total, wenn se oin sehat. „Ui – guck a mal, a Schtorch!“, sagt ma dann gemeinhin.
Mittlerweile kosch aber fascht nirgends mehr nagucka, ohne dass dabei so an Meischter Adebar oder oin von seine G’sella siehsch. Ma muass also bragtisch ununterbrocha „Ui – guck a mal, a Schtorch!“saga. Anschtrengend isch des auf Dauer. I sag’s scho gar nimme bei jedem. Ond manche beschwerat sich sogar scho über dia Viehcher, vor der hintergehaltenen Hand bzw. anderschrum. Ja, dem oina sei Freid – dem andra sei weisses Kirchadächle. Aber ma soll ja et alles schwarz/ weiss seha ond vielleicht gibt’s ja au a vernünftige Verwendungsmöglichkeit für dia Vögel, abseits des Kochtopfs?
Guat, dass es Menscha gibt, dia sich mit dem Thema ernschthaft beschäftigat – han i mir deshalb denkt wia i neilich g’leasa han, dass ma mancherdorfs jetzt nauchdenkt über „Storchenmanager“. Dau verreck! Ja wirklich, schwarz auf weiss isch es g’schdanda in so am Berichtle über den veröffentlichten Teil einer Sitzung. Ond ganz ehrlich liabe Leit: Je mehr i dau drüber nauchdenk, desto sinnvoller kommt mir der Vorschlag vor. Mittlerweile mecht i fascht saga: Der Vorschlag isch der Hammer! Weil so a Schtorch isch ja meischt weit gereist, gut ausgebildet ond hat naturgemäß an super Überblick. Warum also soll so a Schtorch koi Manager weara? Bei Eiercard oder Audi sind doch Pöschtla frei zom Beischpiel. Au in d’r Politik seh i da durchaus Bedarf. Schließlich sait ma dem Schtorch geradezu sagenhafte Kompetenza nauch, grad im Bereich der Familienplanung.
Au in andere wichtige Bereiche, wia der Digitalisierung in onsre Schuala oder der floristischen Ausgeschtaltung von Verkehrsinsla trau i so am Schtorch mindeschtens genausoviel zu wia … halt a mal: Wieso lachat Sie jetzt? Ja, es isch irgendwie unglaublich, aber i han’s doch gleasa, des mit dem Schtorchenmanager. Schwarzweiss!
Was, wia moinat sie? … Ah so, an Manager FÜR dean Storch wellat se! Eieiei, was dau wohl der Schtorch d’rzu saga werd. „Des gibt’s doch gar et!“Wahrscheinlich.