Wünsch Dir was

Zentralkrankahaus »

Allz kommt wiedr: De Ältre von ui wärat des vielleicht no kenna. Vor Jahren hot’s em Fernseh am Samsdigobad a Sendong gea, dia hot „Wünsch Dir was“g’hoißa. Eigentlich war des dr gleich Schmarra wia heit au em Fernseh kommt – bis auf oimol, wo a jonga Denga en ra durchsichtiga Blus’ komma isch.

Etzt kommt des wieder – ond zwar mit de Krankaheisr. Anscheinend däff sich etzt a jedr, der wo Luscht ond Laune hot, a Krankahaus weischa.

Dr Pressl Hebbe von der CSU zom Beischpiel hätt a Klinik gera zwischa Illerberg ond Weißahora. Klar, der wohnt z’Illerberg – ond dr Jengscht isch er au nemme ond em Altr kommat hald amol dia Breschtana. Wenn bei eahm no amol ebbis zwickt hätt er it weit.

Abr em Ehrischt: A Krankahaus an dera Schtell hätt scho ebbis: Des wär o’gfeähr en dr Mitte vom Landkreis, mittledischt zwischa de Großschtädt Senda, Vehrenga, Weißahora ond Dissa ond obadrei neba dr Autobah.

A Autobah-Aschluss isch drom so wichtig, weil Sanka, dia wo aus am Sida kommat, ibr d’Landschtroß gar it zo deam Zentralklinikom nafahra kennat – weil’s z’Diefabach garantiert a Birgerinitiative geah wäd, dia wo a Sanka-Durchfahrtsverbot will, dass se jeds Johr em Hirbscht da Leopoldiritt halta kennat. Ond an Sanka durch Bellaberg fahra lau isch au a Wagnis: Bei dene viele Verkehrsensla kennt’s bassiera, dass sich a Sani-Fahrzeig verirrt.

„Wünsch dir was“machat au d’Birgamoischtr von dr „Süd-Allianz“. Dia wend a großes Krankahaus z’Dissa – wo soscht au. Amol abgseah, dass des a komischa Allianz isch: Beim Krankahaus dätat Dissa ond Altaschtadt angeblich zemahalta, beim Schualgeld sich am liabschta d’Schädl ei’schlaga. Abr wia em Blättle g’schtanda isch, soll des Krankahaus ja it hauptsächlich fir Kranke aus am Landkreis sei, sondern fir oine aus Sennenga, Balza oder Broitadahl ond Seifertshofa. Klar, mit de Patienta aus Ontr- ond Obrroth odr Oschtrberg alloi kasch so an medizinischa Großhandl it omdreiba – wo’s kaum Leit geit, geit’s au kaum Kranke.

I moi, an Autobah-A’schluss hätt a Dissamr Zentralkinikom au – abr do wär des Problem mit am Schtau auf dr Autobah. Wia mir seit a baar Monat wissat, kommat auf dr A7 alle dia Butzala auf d’Welt, dia friher em Dissamr Krankahaus gebora wora send.

I moi, s’Beschte wär, dia 100 Milliona Eiro fir oi gotzigs Großkrankahaus aufzomdoila, om 100 kloine Krankaheisr zom baua. Des wär amol a wohnortneha Versorgong. Abr wo bauat mir no s’Narrahaus na, frogat sich dr

IZetle.