„Hoi, dr Herr Dogder hot gsprocha“
Zum Leserbrief von Dr. Reiner Garreis zur Schättere-Trasse, erschienen in unserer Ausgabe vom Dienstag, 20. Juni, ging diese Zuschrift ein: Der Dogder Garreis hots aber dene Kochemer zoigt, wo dr „Bartl da Moscht holt“. Ja, der muass ja a ganz gscheiter Ma sei. Denn er hat ja in seim Leserbriefle zum Ausbau der „Schättere-Trasse“gfrogt, ob mir Kochemer en „Ukoxit“wellat. Ha no, ha no, han i mir gsait. Ond als oifacher Bürger ohne Abi han i mi erscht schlau macha müssa, was des überhaupt bedeudet ond hoißt. Jetzet woiß i abr au des. Ond dr Herr Dogder spricht en seim Brief von Mord ond Totschlag, wenn dia Radfahrer auf dr Waldertrasse so dahera radla dätat. Mei, i woiß au et, welcha Schublad dr Herr Dogder aufzoga hat, denn bis jetzt hot doch koi Mensch von Mord ond Totschlag gsprocha außer ehm. Ond es dät glei gar et ganga, dass ganze Stadtdoil wia Ebnat ond Waldhausa von dr Kernstadt abgschnitta wärad. Mir send fei fascht Träna komma.
Da trau i mi fascht et zua froga – aber i duas trotzdem – wia send dia Leid seit über 45 Johr aufs Härtsfeld nauf komma? Oder was wär denn, Herr Dogder, wenn no da „Schattere“auf dera Trasse fahra dät? Ond dr Herr Dogder spricht au von einige Leserbriefschreiber, dia koine Radler auf dera Trasse wellat. Abr Herr Dogder, da ka i ehne weiterhelfä. Zwischazeitlich send es 27 Leserbrief, ond ganze fenf, mit ihrem „Briefle“, send für den Trassa-Ausbau. Des hoißt, dia Leid wellet dia seitheriga Wandertrasse erhalta und eba net als Radtrass. Mei abschließender Rat wär, dass so gescheide Leid wia dr Herr Dogder Garreis obedengt in den Stadtrat von Ola nei ghehrt. Oder was moinet ihr? Also nex für ogut, Herr Dogder.
Karl Maier, Aalen-Unterkochen