Schorsch und das Sommerloch

Also Herrschafta, jetzt a mal ganz ehrlich: Von alle Lecher, dias gibt auf derer Welt, dau isch mir des Sommerloch no fascht des liabschde!

Bei ons vorna auf d’r Schtrauß dau isch a Schlagloch, dau han i mir neilich fascht da Fuaß verdrappat. Zom Glick bin I aber mit meim Auto g’fahra. Wer woiß, was dau sonscht bassiert wär! Wobei, des wär a subbr Thema gwea für des Sommerloch heier: „Schorsch von Loch erschlagen – Schlagloch verletzt arglosen Passanten!“

Was für a Schlagzeile! Hammermäßig. „Schornalischt von Zeile erschlagen“sozusagen. Aber momentan fällt derer Bresse gar nix rechts ei, om des Sommerloch zum schdopfa. Des gibt’s doch gar et!

Früher, dau war des halt no anderschd. Denkat bloß amal an des Loch Ness – dem Namensgeaber vom Sommerloch sozusagen. A subbr Sach! A Ungeheuer in am See. Ja, als ob im Silbersee et gnua Heidenheimer rumschwimma dädat! Dau kennt ma doch ebbes draus macha, oder? „Turischtainvasion in Remshart – See kippt vor Schreck um!“

Aber noi – koine Seeungeheuer, nix. Et amal a Schnappschildkröt in am Baggersee, dia oin in da Zeah bissa hat. Oder wenigschtens a kloiner Alligator im Waldbad oder so ebbes. Schlagzeile: „Bademeischder isst Krokodil“. Wobei, dau misst d’r Bademoischder bloß chinesisch essa ganga, und es dät nau au no schtimma.

Wenn Du heier im Sommerloch richtig erschrecka hasch wella, nau hasch bloß Leichtathletik gucka miaßa. Wenn dau bei de Fraua a baar von deane Teschtoschterongranata ihre Leischtungsexplosiona g’het hand. Des war echt ungeheuer. Aber schea – schea war des au et.

Im Brinzip kosch eigentlich blos no drauf hoffa, dass dr Bundestagswal recht bald auftaucha duat. Des wird gwiß erschreckend. Aber leider halt blos mea erschreckend langweilig. Am End gwinnt d’Merkel ond von de andre will mea koiner Schulz sei.

Also nau – I fall jetzt nei in mei Sommerloch. Bis zom nägschda Mal! Eier Schorsch