Mittelschwaebische Nachrichten
Schorsch und die Hundeliebhaber
KNEUES AUS SCHWABLANTIS ennat ihr des au – Spaziergänger, dia mit ihre Hondla schwätzat ond manchmal gar richtige Dialoge führat? Und zwar in Schreiform.
„Määndyy – gang her dau!“Namen griagat dia Hond mittlerweile – Kimberly, Kevin… oder eben au Mandy. Also schallt es durch die Wohnsiedlung: „Määndyy – kommsch du jetzt her! Sabberlot, was soll denn des? Ja wo isch se denn? Hier – jetzt. Fuß! Des gibt´s doch gar et! Mei, was macht se denn?“Moinat diese HundeDrill-Sergeants etwa, dass dia arme Viechla dia Texte in ihrem Hundeschprachzentrum richtig verarbeitet kriagat?
Allawei weiter gat des, in oiner Tour: „Jetzt aber glei Mandy. Hier! Kommsch du ra vom Komposcht! Mandy, aus, jetzt nemmsch den Kopf von der Oma aus’m Maul. Nein, nicht Fass! Fuß!“
Ja, dia Mandy. Dia isch halt scho so a kloiner Kampfterrier. Ond es hört et auf: „Jetzt sag i’s bloß no oimal, Mandy. Nau schebbrat’s. Hierher Mandy. Sitz.“Ja wo isch se denn, was macht se denn, ond überhaupts – wo isch jetzt des Schtöckle, wo hat ses denn? Fehlt am End bloß no, dass se sagat: „Mandy, komm, lass uns drüber reden i bin mir sicher, mir kennat des ausdiskutiera mir zwoi. Ond dia Oma hat dir doch gar nix doa. Ja I woiss, du wolltsch bloß spiela.“
Koi Einzelfall, dia Mandy, jetzt im Frühling ko ma’s mea flächendeckend mithera. Ond was se allt’s für Hondla hand – Rottweiler, Grünweiler, weiße Schäferhond, goldene Retriever, schwarze Pudel (wahrscheinlich zur Mützengewinnung) und natürlich, ganz wichtig, dia Jagdhond.
Wissat ihr, wora ma zweifelsfrei an Jagdhond erkenna duat? – Des send dia Hond, dia allawei vom Herrle seim SUV durch da Wald g’fahra werat…
Bis zum nägschda Mol!
Eier Schorsch
» Ein Video finden Sie online unter mittelschwaebische-nachrichten.de/ schorsch