Schorsch ist reif für die Insel

Des gibt’s doch gar et

IG´schicht han dia Däg an a luschtiga

denka miaßa, dia mir a mal a Englischlehrer verzählt hat. So als kloina Einblick in die Untiefen unseres Bildungsbetriebs.

Also, a Neuntklässler, männlich – nenn mer´n doch oifach mal Fritz – des dät deane Engländer au g´falla – fraugat sein Teacher wia des eigentlich verkehrstechnisch so funktioniera dät, wenn ma mit seim Auto an dia englischa Grenz kommt ond dau auf da Linksverkehr wechsla müasst. A berechtigta Fraug, d´r Bua hat mitdenkt – auf der oina Seite. Auf der andera Seite wär´s vielleicht hilfreich g´wea wenn er g´wisst hätt, dass England a Insel isch, was in deam Fall dia Sach enorm erleichtert.

Dia G´schicht isch scho a baar Jaur her ond zwischenzeitlich hat glaub au onser Fritzle mitkriagt, wie sehr England a Insel isch.

Hand dia sich aufg´führt dau bei dera Fuassball EM. Pfiffa bei de Hymna von de Gaschtmannschafta, bei jedem englischa Tor hand se sich vor Freid gegaseitig die D Variante in da Mund g´schpuckt ond wia se nauche verlora hand send se beleidigt hoimganga vor d´r Siegerehrung.

Umso mehr freit’s mi für onsre Italiener. Wobei ma saga muass, dass dia früher au scho mal mehr g´hupt hand. Mir selber hand ja ohnehin wenig zum hupa g´het bei derer Fuassball EM. Aber

I hoff, mir findat schnell mea zu alter Hupkraft z´ruck bei der kommenda WM in der Wüschte. Ond wer woiss? Vielleicht fahrat mir ja dann nach´m Endspiel am 18. Dezember 2022 laut hupend und grad z´Fleiss im Linksverkehrmodus durch da Kreisverkehr Limbach – und trinkat danauch auf am Christkindlesmarkt no a baar Glühwein und fraugat ons d´rbei, ob net dia ganze Welt inzwischen a Insel woara isch.

In diesem Sinne, Aloah

Eier Schorsch