Markt-Geschichte – Vergliek van fröher to vandagen
Markt is een Verkoopstää van Waren för een Gebiet or Umkreis, wo de Lüe jüst noch na to kunnen.
In’t Mittelöller geev de Landesherr sien Tostimm, sien Verlööf för een’n Markt, meist in Vorjahr or Harfst. Mit klobige Ackerwagen tierden de Lüe dör upknöste Sandwege na ’n Markt hen. Wer nu kien Spannwark harr, de schoof mit de Koor los um sien Woor to verhökern. Nich selten 5 Std. hen 5 Std. woller trüch, hento keem de Markttiet. Överlanges leten sik de Kunnen de Woor noch eben in’t Huus bringen. In’n Harfst Kartüffel, Appeln, Buskohl, Wuddeln glieks in ‘n Keller. De lütten Hannelslüe keem dat stuur an. – In Ollnborg de 1. Markt um 1234. Poor Hunnert Johr later, to Graf Anton Günthers Tiet, beleep sik dat up 4 Märkte in’t Johr. In Vorjahr weer dat de 1. Sonndag na Ostern, denn an’n 1. Juni, 13. Juli un an Michaelis, den 29. September. Ut den letzten Markt is de Ollnborger Kramermarkt, so um 1608, wussen. Man – dat 1. Karussel eerst 1825 upboot. Eens blos een Markt mit allerlei Kraam. So na un na kemen dor mehr Märkte hento. In’n Harfst meist mit Veehmarkt. Af 1655 druffen ok fremde Hannelslüe ehr Woor or Veeh anbeen, besünners de Veehhändler keem dat gelegen.
In de Wersermarsch stunnen vääl Peer to n Verkoop. 1632 harr Graf Anton Günther ’n reinen Peermarkt in Ovelgönne gründt. Dat weer för mennig Johr de gröttste von Düütschland. An de 5000 Peer in’t Johr verkofft. Ok in us Tiet, in’n September Maand is Peermarkr in Ovelgönne. So glieks een Erinnern mit an de grote Tiet.
Een fasten Marktdag in enkelte Städte is de 16. Oktover, St. Gallus, de Gallimarkt.
De 1. Wekenmarkt hier in Ollnborg af 1801. Nu sünd dat dree in de Week, hento kummt de Buurnmarkt.
Bi enkelte gröttere Märkte steiht dat Vergnögen un Unnerhollen an eerste Stää.
De Flohmärkte nehmt `n besünnern Platz in: Dat Verhökern van gebrückte Woor. Bi’n Gang över so een Markt sütt man mennig Stück ut vergahnen Tiet. So ganz von sülben loopt de Gedanken denn is trüch.
In de hütige Tiet de letzte Markt in’t Johr, de Wiehnachtsmarkt. In us Gegend siet de 70er Johr.
Treckt wi is ’n Vergliek. Fröher geev dat poor Märkte in’t Johr. De Lüe kemen dor slecht na to. – Vandagen al in de lüttjen Orte ’n Wekenmarkt, hento 2 - 3 Märkte wo dat Vergnügen an eerste Stää steiht.