LEWE LÄSER!

Harfsttied is in Ollnborg KramermarktsTiet. De Süd-Ollnborger sünd fixer: de hebben al in ’n Sömmer StoppelmarktsTiet. In Oostfreesland gifft dat een Pingstmarkt, een Beestmarkt un een Gallimarkt. De eerste hett öwerhaupt nix mit Religion to doon – un de tweede un darde weern in dat Middelöller noch Veehmarkts – mit beduunde Buurn. Dat hett sük vandag ännert, sovöl Buurn gifft dat ja nich mehr. Un denn gifft dat klorerwies in haast elke Dörp un Stadt ’n Stadtfest or Ortvereensfest or sogor ’n Twüschenahner Wääk. Dat is villicht ’n bäten hoog gräpen, ober eegentlich düürt de Kramermarkt in Ollnborg ja ok länger as blots söben Dage. In dat ole Rom hett dat noch „Brot un Spiele“heten. Rieke un machtige Senatoren un Imperatoren – so as Caesar, Augustus or Nero – smeeten hör Pecunia ünner dat Volk, dat se sülben noch meer politisch Macht kriegen sullen. Un dorbi wurrn ok Löwen un Tiger tägen arme Minschen hetzt. Dat gifft dat bi us neet up ’n Kramermarkt – man, in d’ Kiekkasten, dor kummt dat villicht ok bold, to ’n Bispill in „Dschungelcamp“. In Ollnborg warrt dat kommodig Ünnerhollen mit Speelen un Äten noch nich öwerdreewen – wat ’n Glück!

(Oostfreesk Platt)