Wi hefft snackt mit: Jürgen Seeger
FRAGE: Dat is noch gor nich so lang her, do harrn de mehrsten Lüüd in ehren Kopp een Bild van de Landwirtschaft, dat so utseeg: Een paar Keuh up de Weide, Swien mit Farken up’n Hoff un vör dat Buurnhuus kunnst du Höhner bekieken, de – so as dat Wilhelm Busch seggt hett – „lebensfroh im Sande scharrten“. J. SEEGER: Disse Tiet is vörbi, bi mien Opa un mien Oma, do weer dat noch so. De Technik is up us tokamen, un mit de Technik hefft sik de Burn up Swien oder Keuh oder anners wat utricht. FRAGE: Ok vandaag is dat noch so, dat männigeen bi’n Buurnhoff denkt: Vörn is de Grootdöör, du kummst up de Daal, linkerhand un rechterhand hefft an’n Winterdag de Keuh ehren Platz, baben up’n Böön ward dat Heu verwahrt un liekut geiht dat na de Köök. J. SEEGER: Bi männigeen Buurnhoff is dat noch so. Man de Lüüd hefft umboot. Den direkten Weg van’e Wahnung na de Daal gifft dat nich mehr, un ne’e Stallungen sünd boot wurrn. FRAGE: Lessens heff ik dissen Satz in een Blatt lääst: „Den Alltag auf den Bauernhöfen bestimmt der gnadenlose finanzielle Druck des Marktes“. Kannst du dissen Satz unnerschrieven? J. SEEGER: Dor is in us Tiet kien „Idylle“mehr up’n Hoff. Elkeen Buur is vandaag ok Manager, un he mutt sik mit de Finanzen utkennen. He hett sik na den Markt in Düütschland, in Europa un ok up de Welt to richten. FRAGE: Man snackt in dat Johr 2017 över de „Digitalisierung der Landwirtschaft“. Wat bedütt dat? J. SEEGER: Elkeen Flach is utmeten mit GPS (Globales Positionsbestimmungssystem), un dat nipp un nau up’n Quadratmeter. Dat verdankt wi den Satelliten. Un dat gifft nu Trecker un Maschinen, de up’n Acker sik alleen stüürt. Dat hett den Vördeel, dat nich duppelt düngt ward un dat dat ok för de „Pflanzenschutzmittel“de rechte Dosierung gifft. FRAGE: Wo kann dat angahn, dat vandaag jümmer woller up de Buurn schimpt ward, ofschoonst wi doch de Buurn dat verdankt, dat wi wat to’n Eten hefft? J. SEEGER: In’n Supermarkt gifft dat dat ganze Johr över een best Angebot to’n Eten un Drinken, un dat to’n günstigen Pries. Dat bedütt, de Lüüd hefft vergeten, up wecke Art un Wies us Eten to us kummt. In männigeen Kopp hett sik dat fastsett, as keem dat allns as van sülfst up’n Disch. FRAGE: Een jungen Keerl kummt to di un vertellt, he wull geern up Landwirt lehrn un’n Hoff övernehmen. Wat kannst du em raden? J. SEEGER: Ik kann em dat raden. Dat gifft vele Buureen, de’n Nafolger söökt. Ok in’e fre’e Wirtschaft ward Lüüd socht, de up Landwirtschaft lehrt un studeert hefft.