Radio Globale: De bunte Redaktion
Man kann dat as Krise benömen oder ok as Problem, Lüer mit Migrationsachtergrund oder ok Flüchtlinge. Man kann avers ok eenfach een Projekt anfangen, wo all disse Lüer miteenanner un mit us Düütschen in Kuntakt kaamt un tosamen wat up de Been stellt. Dat hett Dörthe Bührmann van den Lokalsenner „Oldenburg Eins“maakt.
Se hett tosamen mit den Senner de Studios apen maakt un gifft Stütt an Minschen Minschen, de eers kört oder ok al länger in Ollnborg wahnt, dör praktischet Mitmaken in‘t Radio, avers ok in‘t Fernsehen.
2016 gung dat los. Mit een Förderung van dat BAMF (Bundesamt für Migration und Flüchtlinge) kann dat Projekt Radio Globale nu över dree Jahr arbeiten. „De Ollnborger schölt marken, wo vääle verscheden Minschen in de Stadt lewt un wat man allens vaneenanner leern kann“, seggt Dörthe Bührmann.
Un de Redaktion is würklich bunt. Ut all Länner maakt Mischen mit. Mit darbi is Seedy Saidykhan. He is 2016 ut Gambia över dat Mittelmeer kamen. In Gambia hett he för een Radiosenner arbeit un darbi Interviews mit Footballspääler maakt, de politisch verfolgt weern. Darum weern se nu ok achter em her un he möss Angst hebben, dat man em verhaften dä. Dar is he afhaut.
In Italien hett he in de Botschaft van Taiwan Upnahm funnen un is för een paar Maanden in Italien blewen. Denn keem he na Düütschland, wo he mit de Hülp van een Afkaatsche nu up sien „Bliew-Recht“töövt. Se hett em ok na Radio Globale bröcht.
Een Untbillen maakt he ok, as Koopmann för Kurierdeensten un Post-Dienstleistungen.
„Dat hett mien Vermieter för mi klarmaakt“, vertellt he in godet Düütsch.
Bi Radio Globale maakt he in de Redaktion mit, hett avers ok een Internet-Blog, wo he annere Flüchtlinge Moot maakt un Tipps gifft, wo man in Düütschland torecht kaamt. As Footballer is he bi den SSV Jeddeloh in de Tweete Mannschup. Also, bestens integreert.
Een anner Bispill för de bunte Redaktion is Eliene Do Valle ut Brasilien, de alle blots Elly nömt. Se is nicht flücht, sünnern hett in Düütschland de Leevde funnen. Se is Journalistin un wahnt in Rastäe. Siet 2006 is se in Düütschland. Dör ehre Belevnisse as Journalistin kann se bi Radio Globale ok de jenigen hölpen, de vördem nix mit Medien an’n Hoot harrn. Se schickt ehre Berichte ok jümmers na Brasilien, wo se vääle Hörers hett. „De Norddüütschen sünd garnich so stur, as jümmers all seggt“, freit sick Elly över de gode Upnahm in’t Ammerland.
Avers ok Düütsche maakt bi Radio Globale mit. So to´n Bispill Deltlev Wiese. He is een Ollnborger, de an un för sick as Boo-Ingeneur arbeit. „Ik freu mi, dat ik hier mit maken kann un leern so väle unnerscheedlich Lüer kennen. An´n besten gefallt mi de Musik. Weltmusik nöömt wi dat.“He is meist bi jede Redaktionssitzung darbi un hett al vääle Frünnen ut alle Welt funnen.
So kann jedeen bi Radio Globale mitmaken. „Mit jedeen Veröffentlichung kaamt wedder neie Lüer darto. So blifft de Redaktion jümmers bunt, wenn annere wedder wech gaht oder in een annere Stadt treckt,“freut sick de engagierte Projektbaas Dörthe Bührmann. Jedeen Middewäken um Klock fiev dröpt sick de Redaktion bi „Oldenburg Eins“in de Bleicherstraat. Um Klock säben kann man denn de Sendung in‘t Radio unner UKW 106,5 MHz höörn. Mit vääle Geschichten, interessante Narichten un Weltmusik. Darto jedeen tweeten Freedag in’n Maand um Klock nägen abends, Radio Globale TV. Un nu sünd in de Redaktion all gespannt, well na dissen Bericht allens need darto kummt.