…denn fraagt Se ehrn Doktor or den Aftheker…

Tja, wenn de sik man eenig weern. De Doktor schrifft wat gegen de Süük op un de Aftheker seggt, dat de tostännig Krankenkass dat nich ünnerstütten deit un gifft di wat anners mit. Is sowat richtig? Wenn mien Doktor, denn ik jo vertroon do, weet, wat mi helpen kunn, denn will ik dat ok hebben. Bloots wiel de Pharma-Unkels sik mit bestimmte Krankenkassen goot köönt un Priese uthannelt, mutt ik dor unner liern? Wo kann dat angahn, dat sowat Recht is? Geld regeert de Welt, dat mööt wi jümmers wedder begriepen. Man betohlt wi nich all genoog för us Gesundheit: Krankenkass, Pleegkass un wenn denn’ würklich mool wat hest, mösst dat meisde ok noch sülvst betohlen. Vun us geiht Geld in dat Tohooprööhrn vun Pillen, dor gifft dat noch nich mool een Krankheit to. De mutt eerst noch utfunnen weern?! Annersrüm weer mi lewer. Ach, wat reegt wi us op, anners kriegt wi dat noch in’t Liev un wi willt doch in 2018 gesund blieven. Un ji weet jo: To Risiken un Nebenwirkungen fraagt Se den . . .