De Jungschauspäler Jakob Menkens
Dorvan drömt woll vääle Kinner. Egal ob Jung oder Deern. Eenmal at Schauspäler in een Film oder in een Serien mitmaken. So mennig een will ok mal een Star ween. De rode Teppich, Blitzlicht un Autogrammjägers.
Man, vör de meisten blifft dat woll een Droom. Tominns dat mit den Star. Dat so een Läven as Jungschauspäler ok nich jümmers eenfach is, doran denkt de meisten nich. Een, de dat mitmaakt hett, is Jakob Menkens.
Jakob is een ganz normalen Jung van 15 Johr. Sien Opa wahnt in Grodenkneten, he sülven leevt mit sien Öllern un de twee Geschwister in Weimar. Dat Besünnere, he hett 2016 un 2017 in twee Staffeln van „SchloR Einstein“, een Jugendserie op KiKa, mitspäält. Henri Weismann hett he dor heeten. Avers, hett sick för em dormit al de Droom verwürklicht?
Tominns hett he den ersten Schritt maakt. He wull all jümmers wat mit Schauspääl maken. Dat hett he mi bi us Dropen in dissen Sommer vertellt. As denn sien Moder de Anzeig in’t Blatt sehn hett, weer dat för em klar. Dor mööt ik dorbi ween. Un dat weer he denn ok.
De Tied in de Serie weer avers ok anstrengend. Dreiht wurrn de Staffeln nämlich jeweils in een Ruck. Knapp 40 Folgen in twee Jahren. Ok in de Schooltied. Denn wurd he jümmers van een Fahrer van School afhaalt. Dreiht wurd dat in Erfurt. Dat weer nich wiet van Tohus. För sien Frünnen har he domols nich so vääl Tied.
Anners weern dar avers ok vääle goode Saken. Sien Highlight weer, as een Art Klassenfahrt dreiht wurd. Dat weer in de Freetied-Anlage in Hohenfelde. Dor druff he denn Bogenscheeten. Un, „Dor geev dat jeden Dag goodet Äten“, vertellt he mit een Grienen.
Nu is he nich mehr in de Serie. „Irgendwann ward man to old un to groot“, seggt he. He will avers wieter an sien Schauspääl-Kariere arbeiten. „Ik heff mi bi een SastingAgentur bewurben. Dar krieg ik woll bold Bescheed, of ik dorbi bin“. Wat he avers nipp un nau mal maken will, dor is he sick noch nich säker. „Ick arbeit nu erstmaal an eegen Ideen.“Jakob will een historischen Roman schrieven. He will de Tied van den 30jährigen Krieg in een fiktive Welt transportieren. „Viellicht ward dat sogar mehrere Romanen“, överleggt he al.
Nu hett he avers eerstmal een Stipendium krägen un geiht in’t tokamen Jahr för dree Maande na Australien. De Welt kennenleern. Dat is een annern Droom van em.
Man, wieter schauspälern, dat will he ganz säker. Un dat mööt he ok nich mehr drömen. Een Schauspääler, dat is he al.