Ferien up een Eiland

Wo langtöögsch de Daag in de School wesen könnt, wenn een up de Ferien töövt! Man nu weer dat ennelk so wiet. De Kinner kunnen de Kuffers packen. Se wullen na een Eiland meern in de Noordsee.

Ja, un nu seeten se dar, in den Sand an den wietlöftigen Strand. Jan wull stantepee in’t Water un sien Süster jachter achter an. Se sprungen in de Bulgen, smeten sik in de Brekers, dükern unner un kemen verbaast woller hoch. At se ut de Puust weern, lepen se dör den hitten Sand trüch in dat Strandtelt, grepen na een Handdook, störten wat to drinken daal un susen furts woller na’t Water, dwass dör de annern Lüüd. Aver nu slepen se Schippen un Emmer mit. Een deep Lock wullen se graven, so deep, dat se dar in verswinnen kunnen. De Mullsand stoov man so rut, denn keem de natte Sand, de weer leep swoor, se kunnen de Schüppen meist nich mehr bören. De Jung fung an to gnattern, man se smeten de Dinger bisiet un makden mit de Hannen wieter. Aver wo keem nu dat Water her? Jümmer mehr leep in ehr Lock, nu harrn se al den Emmer nödig. Man wo weer de? Heel benaut keken se sik an. „Och nee, den hebbt wi verbuddelt.“gnatter de Jung. Ja, dar blänker doch wat, gau den Sand bisiet un kiek: de Emmer un ok noch een Schüpp kemen vördag. Nu schullen se woll dat Water drock rutschüffeln könen.

S ’avends seeten se bi Disch un harrn Pannkoken mit Appelmus up`n Töller. Dat muchen se geern un harrn dat anners woll as’n Schüündöscher rinschepelt. Man vandagen slepen se bi’t Eten bold in un weern froh at se to Puuch gahn kunnen. Of se nu woll van ehr Wark an’t Water drömen deen?