Beroop kummt vun Beropen
Jümmers so to’n Beginn vun’n April denk ik torüch – för dree Johrn um disse Tied hett sik mien Leven nämli teemlich ännert. Domals hebb ik de Tosaag vun’n NDR kreegen, dat ik dor mien Volontariat maaken kann, also mien journalistische Utbillung. Üm un bi 500 Lüüd hebbt dat probeert, een vunne 18 Plätz to kreegen – un ik hebb dat wirkli schafft. Ut Gannerseer ut de Lokaalredaktschion vunne NordwestZeitung to’n grooden NDR. In’n August 2017 gung dat denn so richdig los un dat weern denn twee heel un deel upregend, spannende Johrn.
Wi harrn Seminaare in Hannover un Hamborg, jümmers in’n Wessel mit Statschionen in’n heelen Norden. Ik weer in’t Studio in Griepswold, in Heid in Holsteen, in Ollnborg, in Flensborg. Bi „Mien Nomiddag“, bi de Talkshow, bi NDR Info un ik weet nich wo noch överall.
Ik hebb lehrt woans een Bidrääge maakt för’t Radio un Feernsehen, woans man sowat schniern mutt un texten un inschnacken. Ik bün so faaken in’t kohle Water schmeten wurrn, hebb ünner so veel Druck un Stress arbeit, hebb twee Johr lang ut’n Kuffer leevt. Man wenn du denn na een Twölf-Stünnen-Daag mit dreihen un schniern un allns op’n Sofo sittst, dat SleswigHolsteen-Magazin löppt un du in’n Feernseher dat sühst, wat du an dissen Daag schafft hest – denn is dat allns vergeten.
Middewiel is dat allns Routine, Alldaag. Ik arbeit tomeist för’t Radio, ik maak Opnahmen, Bidrääge un modereer live bi NDR1 Welle Nord. Ik hebb mi dran wennt, dat ik mien Naam un mien Stimm in’t Radio hör.
Ik bin in’t heele Bunnesland ünnerwegens, jümmers twüschen Nord- un Ostsee – just dor, wo annere Lüüd Urlaub maakt. Un ik draff so veele interessante Lüüd dröpen un in’t Theoter gahn un in’t Kunzert, allns för mien Job! Wokeen kann dat sünst woll seggen. Dor frei ik mi jed een Daag woller op’t Nee’e, dat ik mien Berop(en) funnen hebb.