Amseln in mien Heck
Rund um mien Hus to is een lüttjen Gaarn. De annern Hüüs staht nich wiet weg un so heff ik as de annern Nabers ok dar ’n Rick umto. De een hett hoge Planten insett, de annern woll wat ut Holt of ut Steen maakt. Bi mi is’t ’n lüttje Steenmuur un darto noch wat ut Holt, wo Planten an hoch wassen doot.
In een Vörjahr sehg ik faken ’n Amsel in disse Richt flegen. Se seet ’n Ogenblick up’t Door, denn suus se af in de Heck un weer verswunnen. Harr se jichtens wat in’n Snavel hatt? Dat schien mi woll so. Schull se amenn in mien Heck ’n Nest boen? Up’n mal weer dit Speelwark toenn un ik sehg blots af un an een Amsel. Up mien Door weern nu witte Placken, de mussen ja doch wat mit de Amseln to doon hebben. Schull ik mi argern? Nee, ik frei mi , at bold littje witte Schalen up de Grund legen un denn över dat fiene Piepen, wenn een van de Amselöllern anflegen keem. Ja, bold weer dat Spillwark woller to Enn – de Amsel weern utflogen.
At in’n Harfst de Bläder van mien Heck runnerkemen, kunn ik dat Nest sehn. Ik leet dat dar sitten. Goot so, denn tokamen Jahr weern de Amseln woller dar, an de sülvige Stäe, in dat sülvige Nest. Un so gung dat mennig Johr, bit to den lesden Sommer. Dar hung eenes Dags dat Nest wiet ut de Heck rut un halfnackde lüttje Vogels legen up den Grund. Dar weer nix mehr an to maken, ik heff jem in’n Goorn vergraven. Wer harr dar kien Respekt vör de lüttjen Amseln hatt? Nu is weer Vörjahrstiet. Ik haap, dat de Amseln weerkaamt, ok wenn se woller witte Placken up mien swaart Door maken doot.