Respekt un Bewunnern

An de 23. Mai is elke Johr Grundgesetz-Dag. Leider is dat keen nationalen Fier-Dag för uns. Nich mol arbeits- un schoolfree hebben wi an dissen Dag. Dat is ungerecht… un dat is oorich. Ik persönlich hebb de gröttste Respekt in de düütsche Geschichte in de verleden Dusend Johrn för de 4 Frolü un de 70 Mannslü, de up de moije Insel Herrenchiemsee dat Grundgesetz int Johr 1949 upsett un beslooten hebben.

Worüm? Eerstens hebben disse „Moders un Vadders“van uns Grundgesetz man blots veer Johr achteran van Adolf Nazi de Sinn, Moot un Verstand hatt, sük up de Wuddeln van Humanismus, Christendom, Recht, Örnung un Demokratie to besinnen, de dat tja al vörher in Düütschland gäben harr (Paulskirche 1848, Weimarer Republik 1919); tweedens läben wi nu siet över söbentig Johrn in Freeden, Gerechtigkeit, Wohlstand un Anstand

mitnanner – meestiets jedenfalls, sünner van de anonymen Krawall- un Dootmakers in Facebook un up in de Football-Slachtfeller; dardens hebben disse Respekt-Mitminschen van Herrenchiemsee de politisch Willen un Moot hatt, disse minschliche Form van

„Staat“in Düütschland mit een „Zivil-Sellskup“dortosetten – mit de Parteien-Pluralismus up Tiet dör Wahlen un een Parlament un Regeeren up Tiet; veerdens kann, wenn dat Wahlvolk dit respektvull Grundgesetz nich wedder minnachtig wechsmieten deiht, nie nich mehr een „Führer“up Läbenstiet in een „Dusendjährig Riek“Macht an sük rieten. Politisch Macht gifft dat in de Demokratie blots noch up Tiet! Manns- un Froonslü hebben glieke Rechte! Un dat Militär warrt van dat Parlament kuntrullert! Dat is de Basis van uns Grundgesetz. Un Fieftens kannst du al mit een eenzig Satz in Artikel 1 (1) dat heele Grundgesetz tosommenfaten: „Die Würde des Menschen ist unantastbar.“

„Bewunnern“hebb ik woll för Hunnerte van Lü in de düütsche Geschichte – to ’n Bispill för … Luther, Lessing, Kant, Goethe, Annette von Droste-Hülshoff, Theodor Storm, Kafka, Heinrich Mann, Walter Rathenau, Bischof von Galen, Geschwister Scholl, Oberst von Staufenberg … un, ja, ok för mien Moder, as Trümmerfro na den Krieg.

„Respekt“hebb ik för de 74 kloke, politische Lü in Herrenchiemsee ut dat Johr 1949, bi de sware Anfang van uns Bundesrepublik Deutschland.

BILD: dpa Konrad Adenauer, de Vörsitter van‘n „Parlamentarischen Rat“, schrifft sinen Naam unner dat „Grundgesetz“, dat an‘n 23. in‘n Maimaand 1949 up‘n Weg brocht wurd.